İranın təhlükəsizlik qüvvələri sentyabrın ortalarında başlayan və bu günə qədər davam edən etiraz aksiyaları zamanı azı 448 nəfəri öldürüb, onların yarıdan çoxu etnik azlıqların yaşadığı bölgələrdədir.

Yenixeber.org: Bu barədə İranın insan haqları qrupu çərşənbə axşamı bildirib.

Qrupun məlumatına görə, öldürüldüyü təsdiqlənən 448 nəfərdən 60-ı 18 yaşdan kiçik yeniyetmə və uşaqlar, habelə 9 qız və 29 qadındır.

Qeyd olunur ki, təkcə son bir həftədə təhlükəsizlik qüvvələrinin əməkdaşları tərəfindən 16 nəfər öldürülüb, onlardan 12-si etirazların xüsusilə intensiv olduğu ərazilərdə qətlə yetiriliblər.

Əvvəlki həftələrdə öldürülən insanların ölümləri barədə məlumatlar təsdiqləndikdən və siyahıya daxil edildikdən sonra ölənlərin sayı daha da artıb. Ölənlərin sayına yalnız repressiya zamanı qətlə yetirilən vətəndaşlar daxildir, təhlükəsizlik qüvvələrinin əməkdaşları siyahıya daxil deyil.

Xatırladaq ki, sentyabrın 16-da Məhsa Əmini adlı qadının düzgün taxılmamış hicaba görə əxlaq polisi tərəfindən qətlə yetirilməsindən sonra İranda mitinqlər başlanıb. Ölkənin güc strukturları etirazçılara qarşı zorakılıq tətbiq edir, kütləvi şəkildə həbs edir.