Azərbaycan qeyri-neft ixracını -44% artırıb

Bu ilin ilk yanvar-noyabr aylarında Azərbaycanın ixracının dəyəri 19,8 milyard ABŞ dolları, qeyri-neft sektoru üzrə ixracının dəyəri isə 2,4 milyard ABŞ dolları təşkil edib.
Yenixeber.org: Bu barədə İqtisadi islahatların Təhlili və Kommunikasiya Mərkəzindən (İİTKM) xəbər verilir.
Məlumata görə, ötən ilin eyni dövrü ilə müqayisədə qeyri-neft sektoru üzrə ixracın dəyəri 721 milyon ABŞ dolları və yaxud 44% artıb.
2021-ci ilin 11 ayında ixrac olunmuş meyvə-tərəvəz məhsullarının dəyəri ötən ilin eyni dövrü ilə müqayisədə 259 min ABŞ dolları artaraq 549,8 milyon ABŞ dolları təşkil edib. Müvafiq dövr ərzində qeyri-neft ixracında pambıq iplik 3,4 dəfə, qara metallar və onlardan hazırlanan məmulatlar 2,3 dəfə, kimya sənayesi məhsulları 2,7 dəfə, pambıq lifi 70,2%, şəkər 29,8%, alüminium və ondan hazırlanan məmulatlarda isə 69,3%, artım qeydə alınıb.
Normallaşma prosesinin davam etdiyi dövrdə noyabr ayı üzrə ixrac 2,95 mlrd ABŞ dolları təşkil edib. Qeyri-neft sektoru üzrə ixracda artım 58,7% təşkil etməklə 307,2 mln ABŞ dolları olub. 2021-ci ilin noyabr ayı ərzində yeyinti məhsulları üzrə ixrac ötən ilin müvafiq ayı ilə müqayisədə 1,6% artaraq 98,9 milyon ABŞ dolları, qeyri-yeyinti məhsulları üzrə isə 2,2 dəfə artaraq 208,3 milyon ABŞ dolları təşkil edib.


