AZ
RU
Unikal layihə:“Böyükşor” gölündə üzən elektrik stansiyası istismar edilməyə başlayacaq
Gələn il “Böyükşor” gölündə üzən günəş elektrik stansiyası istismara veriləcək. Stansiya Asiya İnkişaf Bankının dəstəyi ilə həyata keçirilən “Üzən günəş panelləri sisteminin inkişafına dair biliklərin mübadiləsi və texniki yardım dəstəyi” pilot layihəsi çərçivəsində tikiləcək. 100 kVt-luq günəş elektrik stansiyasının tikilməsinə artıq başlanılıb. Bu barədə energetika naziri Pərviz Şahbazov “Respublika” qəzetində dərc olunan məqaləsində bildirib.
Yenixeber.org: Onun sözlərinə görə, stansiyanın növbəti ilin əvvəlində istismara verilməsi planlaşdırılır: “Ümumilikdə, “Böyükşor” gölündə 50 MVt gücündə üzən fotovoltaik stansiya üçün texniki-iqtisadi əsaslandırma, biznes modellərin seçilməsi və bərpa olunan enerji mənbələri üzrə tarifin qiymətləndirilməsi hesabatları hazırlanıb”.
Nazir bildirib ki, bununla yanaşı, gələcəkdə su obyektləri üzərində iri həcmli layihələrin həyata keçirilməsi üçün araşdırmalar aparılır: “Bu məqsədlə ölkə üzrə su hövzələrinin məlumat bazası yaradılıb və 19 su obyektinin enerji potensialı hesablanıb”.
"Üzən Günəş Enerjisinin İnkişafı" adlanan layihə 17 Avqust 2018-ci il tarixində Asiya İnkişaf Bankı Direktorlar Şurası tərəfindən təsdiq edilib. Layihə Azərbaycanda və başqa ölkələrdə günəş elektrik stansiyalarının yaradılması üçün texniki dəstəyin verilməsini nəzərdə tutur.
