Yenixeber.org: Bu günlərdə redaksiyamıza Sabirabad Rayon Balakənd kənd ümumi orta məktəbin müəlliməsi Qəfərova Zibeydə Cabbar qızının Azərbaycan Respublikasının Prezidenti İlham Əliyev cənablarına, Azərbaycan Respublikasının Birinci vitse-prezidenti Mehriban xanım Əliyevaya, Baş Prokurorluğa, Elm və Təhsil Nazirliyinə, Dövlət Təhlükəsizlik Xidmətinə, İnsan Hüquqları üzrə Müvəkkilə və digər dövlət qurumlarına yazdığı şikayət ərizəsinin surəti daxil olub. Zibeydə Qəfərova qeyd edir ki, “Mən 2020-ci ildə MİQ-in imtahanlarında iştirak etdim və Sabirabad Rayon Balakənd kənd ümumi orta məktəbinə müddətsiz müqavilə sənədi əsasında müəllimə təyin olundum. Həmin vaxtdan bu günə kimi direktor müavini Vüsalə Əlimusa qızı Umudova tərəfindən qərəzə və olmazın təzyiqlərə məruz qalmaqdayam. Düzdür, əvvəllər bu barədə məktəbin direktoru Ramin Əliyevə müraciət etmirdim. Çünki, məndə belə bir fikir formalaşmışdı ki, Vüsalə Umudovanın əməllərindən direktorun məlumatı var. Belə bir səbəbdən də, dəfələrlə öz ərizəm əsasında işdən uzaqlaşmaq qərarına gəlmişdim. Elə ki, 2022-2023- cü tədris ili başladı, o halda Vüsalə Umudovanın olmazın təhqirlərinə, hədələrinə, mənə qarşı etdiyi rəftara və s. heç cür dözə bilmədim.

Qeyd edim ki, Şirvan şəhərində yaşadığımdan birinci saatlara gedib çata bilmirdim, eyni zamanda həftədə 8 saat biologiya dərsim olduğu üçün, rəhbərlikdən məni nəzərə almalarını xahiş etmişdim. Bildirim ki, müəllimlik fəaliyyətimə başladığım ilk ildə Vüsalə Umudova məndən 50(əlli) manat pul aldı və o, cədvəldə dərs saatlarımı iki günə yerləşdirdi. 2022- 2023-cü tədris ilində isə, direktor müavini öz rəfiqəsi, hansı ki, məktəbin texnologiya müəlliməsi Lamiyə Mikayıllıdan mənə xəbər çatdırdı ki, ona 50 manat pul verməyəcəyim təqdirdə, bu dəfə cədvəldə dərs saatlarımı 3-4 günə yerləşdirəcək. (Bütün bunları sübuta yetirmək üçün məndə kifayət qədər votsap yazışmaları var) Elə ki, günlər keçirdi, o halda Lamiyə Mikayıllı hər gün məndən pulu verib-verməyəcəyimi soruşurdu, hətta pulun verilməsinin vacib olduğunu da deyirdi. Qeyd edim ki, Lamiyə müəllimə ilə mən Şirvan şəhərindən məktəbə birlikdə gedirik. Bu müəllimənin 5 saat texnologiya dərsi bir günə, mənim 8 saat, hansı ki, hər biri 2 saatlıq dərs olduğu halda 3-4 günə salınacağı bildirilirdi. Həmin il rayonun Bulaqlı məktəbindən ikinci iş yeri olaraq əlavə saat hesabı dərs götürdüm. O halda Vüsalə Umudova məni yanına çağırdı və dərs cədvəlinin yenidən tərtib olunduğunu bəhanə edib, ayda ona 20 manat pul verməli olduğumu dedi.  Mən də ona nə 50 manat, nə də ki, 20 manat verməyəcəyimi və bu haqda direktora müraciət edəcəyimi bildirdim. O halda Vüsalə Umudovanın sözü o oldu ki, “get kimə istəyirsən müraciət et. Dərs saatlarının yiyəsi mənəm, direktor kimdir?”. Belə olan halda məcbur olub direktorun qəbuluna keçdim. (Bildirim ki, həmin günə qədər Vüsalə Umudova nə mənim, nə də ki, digər müəllimlərin direktora sözümüzü deməyə imkan vermirdi və hər işi onun vasitəsilə görməyi tələb edirdi). Elə ki, direktor Ramin Əliyev baş verənlər haqda məlumatlı oldu, o halda o, mənə bərk əsəbləşdi və indiyə qədər niyə məlumat vermədiyimi, hansı səbəbdən problemləri ondan gizlətməyimi soruşdu. Qeyd edim ki, başqa bir müəllim də hansısa bir problemlə bağlı məsələni direktora çatdırmışdı. Həmin vaxt direktor müəllimləri iş otağına topladı və müavini Vüsalə Umudovanı ciddi şəkildə danladı, hətta ona ərizə yazıb işdən çıxmağı, etdiyi hərəkətlərə görə onu Əmək Məcəlləsinin müvafiq maddəsi ilə cəzalandıracağını da qeyd etdi. Daha sonra direktor mənə və bütün müəllimlərə belə bir işlərdən xəbərinin olmadığını bildirdi. Həmin vaxt Vüsalə Umudova bizim yanımızda direktora hirsli cavab verdi və o, “Məni məktəbə müavin siz təyin etməmisiniz və işdən də azad etməyə gücünüz çatmaz” dedi və qapını bərk vuraraq otaqdan çıxdı. Həmin vaxtdan bir növ “qara günlər”im başladı. Yəni, Vüsalə Umudova məni “xəbərçi” adlandırdı, müəllimlər arasında məni təhqir etməyə və alçaltmağa çalışdı. Direktor müavininə qarşı lazımi tədbirlərini görmək istədikdə isə, Sabirabad Təhsil sektorunun müdiri tərəfindən təzyiqlərə məruz qaldı. Hətta, bir dəfə sektor müdiri Pəhlivan Qarayevin özü məktəbə gəldi və heç bir müəllimi dinləmədən, məsələləri araşdırmadan Vüsalə Umudovanın mövqeyini müdafiə etdi. Direktoru bizim yanımızda, bizi isə Vüsalə Umudovanın yanında heçnə edərək çıxıb getdi. Sektor müdiri hər kəsə çatdırdı ki, direktor müavini onun adamıdır və həmin gündən də Vüsalə Umudova müəllimlərin hamısını, əsasən də məni aşağılamağa başladı. Hətta, bir dəfə müəllimlərin gözləri qarşısında o, mənə qarşı fiziki güc də göstərdi. Direktor ona, niyə belə edirsən deyən kimi, bu xanımın şantajı və verdiyi cavab üç cümlədən ibarət olur “Sən kimsən, müəllim kimdir? Əcəb edirəm. Pəhlivan müəllimə zəng edib deyəcəyəm! Pəhlivan müəllimə vaxtında 2500 dollar pul vermişik və o da, söz verib ki, mən nə qədər təhsil sahəsində çalışıram, sən də “zavuç” olaraq işləyəcəksən, 18 saat dərslə də təmin ediləcəksən”.

Hal-hazırda bütün müəllimlər Vüsalə Umudovanın şantaj əməllərindən və Pəhlivan müəllimdən çəkindikləri üçün, sanki sakit dayanmağa məcbur olublar. Vüsalə xanım lazım gəldikdə direktoru da şantaj etməyi bacarar. Hər kəs dəqiq bilirik ki, direktor müavini vəzifəsində çalışan bu xanım məktəbdə sosial məzuniyyət ştatına müvəqqəti işə götürülənə qədər, bir gün də olsa belə hansısa sahədə pedaqoji fəaliyyətlə məşğul olmayıb. Vüsalə Umudova MİQ-in imtahanlarında iştirak etməyib və ehtiyac olmadığı halda o, 2013-ci ildə müddətsiz müqavilə sənədi əsasında məktəbdə müəllim vəzifəsində saxlanılıb və qohumluq əlaqələrindən istifadə etməklə, direktor müavini vəzifəsinə təyinat almağı da bacarıb. Bu xanımın əmək kitabçası isə, Qalağayın kənd Əli Qurbanov adına tam orta məktəbin sabiq direktoru, hansı ki, həmin illərdə vəzifəsindən azad olunmuş Seyidəli Hadıyevin adından saxta yolla qaydaya salınır. Bunu sübut etmək üçün yetərincə faktlar var. Sadəcə olaraq hər kəs Vüsalə Umudovanın şantaj əməllərindən ehtiyat etdiyi üçün, bunu müəyyən mənada gizlətməyə məcbur olurlar. 06 oktyabr 2023-ci il tarixdə dərs saatlarım olmadığından, Birinci və İkinci Qarabağ müharibəsi iştirakçısı, qazi, hansı ki, tank komandiri vəzifəsində çalışmış, ruhi-əsəb problemləri olan, müharibə dövründə gözündən ağır xəsarətlər alan, onkoloji xəstəliyə düçar olduğundan Onkologiya Mərkəzində müalicə olunan xalamın həyat yoldaşına, həm də xalama baş çəkmək üçün, qeyd olunan mərkəzə getmişdim. Həmin gün direktor mənə zəng etdi və nəyə görə dərsdə olmadığımı soruşdu. O halda müəllim, bu gün dərs saatım yoxdur və özüm də Onkologiya Mərkəzindəyəm deyə cavab verdim. Az sonra direktor Ramin Əliyev mənə “Vüsalə Umudova təhsil sektoruna zəng edib və belə bir məlumat da verib ki, Zibeydə Qəfərova dərs saatları olduğu halda işə gəlmir” dedi. Qeyd edim ki, Vüsalə Umudova ikinci iş yerində işləyəcəyim təqdirdə, dərs cədvəlində mənə aid dərs saatlarını qaydaya salmayacağını demişdi. Elə ki, həmin gün direktor dərs saatlarımın olmadığını bildi, o halda o, “Heç bir problem yoxdur, məsələni özüm qaydaya salacağam” dedi. Həmin gün Onkologiya Mərkəzindən çıxdım və birbaşa saat 17:35 radələrində Sabirabad rayon təhsil sektorunun müdiri Pəhlivan Qarayevin qəbulunda oldum və hər şeyi ona olduğu kimi danışdım. Qəbulda olarkən Vüsalə Umudovanın dediklərini də, yəni “Sən kimsən, müəllim kimdir? Əcəb edirəm, təhsil idarəsinə zəng edirəm, yenə də zəng edib deyəcəm. Atam bu işə düzəlməyim üçün vaxtında 2500 dollar pul verib və Pəhlivan Qarayev də mənə söz verib ki, sən  “zavuç” işləyəcəksən və 18 saat dərslə də təmin olunacaqsan” dedim. Bir sözlə, bütün bunları Pəhlivan müəllimin diqqətinə çatdırdım.  Çünki, hər dəfə biz Vüsalə Umudovadan bu sözləri eşidirik. Qəbulda şifahi dediklərimi dedim, qalanlarını da yazılı formada rəhbərliyə təqdim etdim. Bütün bunlara baxmayaraq, bu günə kimi Vüsalə Umudova ilə bağlı heç bir araşdırma işləri aparılmayıb.  

    Hörmətli redaksiya!

  Mən bu müraciətimi Sizə əlacsızlıqdan, baş verən olayların qarşılığında bir növ aciz qaldığımdan yazıb göndərmək qərarına gəldim. Çünki, 15 oktyabr 2023-cü il tarixdə Mil-Muğan Regional Təhsil İdarəsinə, şəxsən idarənin rəisi cənab Rəşad Musayevə şikayət məktubu ünvanlamışam və həmin vaxtdan 20 gün keçməsinə baxmayaraq, hələ də lazımi araşdırma işləri həyata keçirilməyib, əksinə mənə qarşı yeni təhdidlər, yeni şantajlar davam etməkdədir. Bir sözlə, direktor müavini Vüsalə Umudovaya yenidən mənə qarşı aqressiya nümayiş etdirmək, məktəbin direktorunu şantaj etmək imkanı yaradılıb. Faktdır ki, bu günə qədər Vüsalə Umudova ilə bağlı heç bir tədbir görülməyib, hansısa araşdırma işləri həyata keçirilməyib. Çünki, bu xanımın “daydayısı” çox güclüdür və o, bunu müəyyən yollarla bizim diqqətimizə də çatdırır. Amma, Vüsalə xanım hələ də onu dərk etmir ki, ölkəmizin rəhbəri var, ölkəmizin işlək dövlət qurumları və mükəmməl qanunları var!.

   06 noyabr 2023-cü il tarixdə Vüsalə Umudova mənə yaxınlaşdı və o, Nazanı İbadova ilə birləşdiyini, yaxın vaxtlarda direktoru şantaj edib tələyə salacaqlarını, hətta videoya çəkəcəklərini də dedi. O, mənim də oxşar aqibəti yaşayacağımı nəzərimə çatdırdı və onu da vurğuladı ki, ya ərizəni yaz işdən özün çıx,  ya da ki, qız uşağı olmağına baxmayaraq, səninlə bağlı biabırçı video-çəkilişlər həyata keçirib, birbaşa səni eloba, dost-tanış və s. arasında rüsvay edəcəyik. Vüsalə Umudova mənə “Həyat yoldaşım belə işləri çox ustalıqla yerinə yetirir. Çünki, onun arxa-dayağı mənəm və mənim qohumlarımdır” deməyi də unutmadı. Bu cür açıqlamalardan sonra həyatımın olduqca təhlükədə olduğunu hiss edirəm. Mən ölkə rəhbəri möhtərəm İlham Əliyev cənablarına olduqca inanıram. Faktdır ki, biz cənab Prezidentin əyilməz iradəsinin qarşılığında ərazi bütövlüyümüzə nail olduq. Mən qəti şəkildə inanıram ki, Sabirabad Rayon Balakənd kənd ümumi orta məktəbinin direktor müavini Vüsalə Umudovanın qol qoyduğu əməllərlə bağlı, həmçinin ona belə bir addımlarını atmağa şərait yaradan, fürsət verən vəzifə sahibləri ilə bağlı lazımi tədbirlərin görülməsi üçün, cənab Prezident aiddiyyatı dövlət qurumlarına lazımi tapşırıqlarını verəcək. Yazıda adı keçən hər kəsin mövqeyini dinləməyə və dərc etməyə hazırıq.(GundemXeber.Az)

P. S. Hörmətli oxucular! Yaxın günlərdə Sabirabad Rayon Balakənd kənd ümumi orta məktəbinin direktoru Ramin Əliyevlə əlaqə saxlamağa və ondan məsələlərə münasibət öyrənməyə çalışacağıq. Odur ki, bizi izləməyi unutmayın.