Sumqayıtın yeni təyin edilən icra başçısı Zakir Fərəcov yaşayış binalarında olan qanunsuz eyvanların və artırmaların sökülməsi barədə göstəriş verib.

Xeberinfo.com:   Məlumata görə, bu barədə jurnalist Vüqar Qurdqanlı məlumat verib. Onun sözlərinə görə, bir müddət əvvəl İcra Hakimiyyətinin yaxınlığında olan binalar daş örtüklə üzlənib. İndi isə binalarda eyvanların sökülməsi prosesinə başlanılıb ki, bu da soyuq havalarda bir çox sakinlərə ciddi problemlər yaradır. “Çünki “təmir abadlıq” dövründə mənzillərin soyuqdan və yağntıdan qorunmasını təmin etmək mümkün olmayacaq. Bu bir yana, təqdim etdiyim fotolardan da göründüyü kimi sözügedən eyvanlar binanın əsas hissəsinə bitişik tikilib və binanın bir hissəsidir. Demək həmin balkonların sökülməsi faktiki olaraq insanların mənzilinin sökülməsi və qış aylarında ev mühitinin açıq hava ilə birbaşa təmasda olması anlamına gəlir. Mənim yaşadığım ev də həmin problemlə üz-üzədir. Qış aylarında evi qızdırmaq üşün istifadə etdiyimiz kondisonerlərin də sökülməsi tapşırığı verilib. İcra Hakimiyyətinin Elməddin adlı işçisi deyir ki, sabah (03.11.2015) günorta bütün balkonlar lomla uçurulacaq. Belə olsa şəxsən mənim ailəm soyuq gecəni bir tərəfi yola açıq otaqda keçirməli olacaq” – deyə şikayətçi bildirir.