Böyük Britaniyanın Baş naziri Boris Conson Brexit üzrə danışıqların müddətini yenidən uzatmaq əvəzinə qanunun pozmaq və parlamentin qərarını yerinə yetirməmək niyyətindədir.

Yenixeber.org:  Bu barədə Boris Consonun rəhbərlik etdiyi hakim Mühafizəkarlar partiyasının üzvlərinə göndərdiyi məktubda deyilir.

Britaniyanın baş naziri məktubunda müxalif partiyaların təşəbbüsü ilə parlamentin qəbul etdiyi və hökuməti Brexit üzrə danışıqların müddətini uzatmaq üçün Brüsselə sorğu göndərməyə məcbur edən, həmçinin Avropa İttifaqından sazişsiz çıxmağa qadağa qoyan qanun layihəsini xatırladıb.

“Onlar Brexit vaxtını uzatmaq üçün məni Brüsselə yalvarmağa məcbur edən qanun layihəsini qəbul ediblər. Mən bunu heç vaxt etmərəm”, – deyə Baş nazir bildirib.

“Sky News” telekanalı isə öz növbəsində qeyd edir ki, parlamentin iradəsini yerinə yetirməyəcəyi və müvafiq məhkəmə qərarının icrasından imtina edəcəyi təqdirdə Boris Consona qarşı məhkəmə iddiaları qaldırıla və o, həbs oluna bilər.

Qeyd edək ki, Birləşmiş Krallıq Brexit qərarı ilə bağlı rəsmi bildiriş göndəriləndən iki il sonra – 2019-cu il martın 29-da Avropa İttifaqını tərk etməli idi. Lakin Britaniya parlamentinin İcmalar palatasının deputatları Brüssellə Boris Consonun sələfi Tereza Mey arasında əldə olunan Brexit şərtləri barədə saziş layihəsini üç dəfə rədd ediblər. Nəticədə Avropa İttifaqı Brexit prosesini əvvəlcə aprel və ya may aylarına, sonra isə oktyabrın 31-nə təxirə salmağa razılıq verib. Tereza Mey vəziyyəti dalandan çıxara bilməyərək istefa vermək məcburiyyətində qalıb, onun yerini isə Brexit prosesinin yenidən təxirə salınmasına yol verməyəcəyini və Brüsselin Londonun tələbi ilə razılaşmayacağı təqdirdə ölkəsinin Avropa İttifaqını sazişsiz tərk edəcəyini vəd edən Boris Conson tutub.