“Rusiyanın qərarı tezliklə bəlli olacaq, Azərbaycanı, yoxsa Ermənistanı cəzalandırsın”. 

"Xeberinfo.com": Bu fikri Ermənistanın sabiq xarici işlər naziri, deputat Aleksandr Arzumanyan bugünkü mətbuat konfransında deyib. 

“Şəxsən mən Ermənistanı sivil Avropa ailəsində görürəm və qəti şəkildə Avrasiya, Gömrük ittifaqlarına qoşulmağın əleyhinəyəm. Üstəlik, bu qurumların təsisçiləri türkdilli ölkələrdir. Rusiya üçün çox vacib idi ki, Ukraynanı Gömrük və Avrasiya ittifaqlarına cəlb eləsin, Ermənistanı yox”, - deyə Arzumanyan vurğulayıb.

Sabiq nazirin sözlərinə görə, hələ ki Rusiyanın başı Qərblə münasibətləri aydınlaşdırmağa qarışıb və yalnız ondan sonra Ermənistanın üzvlüyü məsələsinə baxacaq. Onun qənaətincə, texniki xarakterli bir neçə məsələ var ki, onlara görə qəbul ləngiyir: “Rusiya iqtisadi resurslara malik Azərbaycanı quruma qoşmağa cəhd edəcək. Həmçinin, öz tərəfdaşları ilə münasibətləri aydınlaşdırmağa çalışacaq. Odur ki, üzvlükdən imtina edən Azərbaycanı, yoxsa özünü necə aparmasından asılı olmayaraq Ermənistanı cəzalandırmaq barədə qərar verəcək”.