Fərid Əhmədovun ədliyyə naziri təyin olunması ədliyyə sistemində böyük panika yaradıb.

Yenixeber.org: Bu barədə məlumatı ədliyyə orqanlarına yaxın bir neçə mənbədən əldə etmişik.

Saytımıza verilən məlumata görə, nazir vəzifəsinə ədliyyə sistemində işləməyən, “yad” bir şəxsin gətirilməsi həm nazirlikdə, həm də Ədliyyə Nazirliyinin tabeliyində olan orqanlarında “soyuq duş” effekti yaradıb.

Qeyd edək ki, 45 yaşılı yeni Ədliyyə naziri Fərid Əhmədov ixtisasca hüquqşünas olsa da, ədliyyə sistemində çalışmayıb.

Onun sələfi Fikrət Məmmədov 24 il bu postda çalışıb. Nazirlikdə və ədliyyə orqanlarında əsas vəzifələri  də təbbi olaraq onun kadrları tutur. Eyni zamanda bu dövrdə ədliyyə sistemində hamıya məlum olan "daxili qaydalar" formalaşıb. Yeni nazir isə bu sistemdə kiçik istisnalarla heç kimi tanımır. Ona qədər illər ərzində oturuşmuş qaydalardan da yəqin ki, xəbərsizdir.

Başqa dövlət qurumlarındakı dəyişikliklərin təcrübəsi göstərir ki, sistemdən kənar kadrın rəhbər posta təyinatı ciddi dəyişikliklərə ehtiyac yarandığı zaman həyata keçirilir. Yəni, böyük ehtimalla Ədliyyə Nazirliyində də böyük dəyişikliklərə start veriləcək. Həm mövcud sistemin, həm də kadrların yenilənməsi həyata keçiriləcək.

Ədliyyə sistemində yaranmış böyük panikanın səbəbi də məhz bununla bağlanılır. Uzun illər ərzində nazirliyin “gəlirli” sahələrində kök salmış məmurlar yalnız vəzifələrini itirəcəklərindən deyil, həm də “çirkli” əməllərinin araşdırılacağından, hətta məsuliyyətə cəlb edilə biləcəklərindən narahat olmağa başlayıblar.

Redaksiyamıza verilən məlumatda o da qeyd olunur ki, yeni nazirin ədliyyə orqanlarında üzərinə gedəcəyi çoxsaylı problemlər mövcuddur.

Belə ki, yeni nazir ilk addım kimi yeni cəzaçəkmə müəssisələrinin tikintisinin uzun müddət ləngiməsini, bu istiqamətdə ayrılan külli miqdarda vəsaitin haralara sərf olunmasını araşdıra bilər.

Habelə, dövlət vəsaitlərinin həbsxanalarda və istintaq təcridxanalarında “yoxa çıxması”, bir çox hallarda məhbusların insan ləyaqətini alçaldan formada saxlanılması, müalicə müəssisələrinin varlı məhkumların “istirahət mərkəzinə” çevrilməsi halları da diqqət mərkəzində ola bilər.

Qeyd olunur ki, Penitensiar Xidmətin tabeliyində olan bütün cəzaçəkmə müəssisələri, həbsxanalar rəhbər şəxslərin bitib-tükənməyən pul qaynağıdır. Təkcə dövlət resurslarının mənimsənilməsi deyil, məhkumların hesabına hər ay milyonlar manat vəsait toplanır.

Türmə rəisləri, icra orqanlarının rəhbərləri oliqarxlara çevriliblər. Ədliyyə sistemində gözlənilən dəyişiklik heç şübhəsiz bu “ədliyyə oliqarxlarına” da toxunacaq.

Bir sözlə  ədliyə sistemində hər kəs "daşların yerindən oynayacağını" gözləyir, buna hazırlaşır. Yeni naziri isə on illiklər ərzində formalaşmış, kök atmış bürokratik, korrupsioner sistemi dəyişmək kimi çətin vəzifə gözləyir.

Bacaracaqmı, zaman göstərəcək.(Azpolitika)

Rasim Əliyev