Yenixeber.org: Hakim Rasim Sadıqovun sədrliyi ilə keçirilən prosesdə zərərçəkmiş Anar Kazımov ifadə verib. O deyib ki, idman malları mağazası işlədib. Zərərçəkmiş qeyd edib ki, rəhbərini atası olduğu “İndeks.az” MMC-nin ofisindən içərisində 43 min 200 manat olan seyf aparılıb.

Anar Kazımov deyib ki, mağazanın dəmir barmaqlığı qırılıb və pəncərədən içəri daxil olublar.

Təqsirləndirilən Rüfət Qurbanov bu cinayəti özünün tək törətdiyini deyib.

Söyləyib ki, seyfi tək götürüb və taksiyə qoyaraq aparıb. Əlavə edib ki, seyfdə 43 min 200 manat olmayıb. O, 27 min manat və 200 dollar götürdüyünü deyib.

“Mənim üçün fərq eləmir. 100 min də olsa, deyərdim. Amma o qədər pul olmayıb”- deyə Qurbanov qeyd edib.

Zərərçəkmiş isə həmin gün pulu saydıqlarını deyib.

Rüfət Qurbanov oğurluq hadisəsini törətdikdən sonra Türkiyəyə gedib. O, oğurladığı pulu Antalyada əylənməyə, istirahətə xərclədiyini deyir.

Məhkəmənin növbəti iclası oktyabrın 9-na təyin edilib.

İttiham aktına əsasən, R.Məmmədov, E.Aslanov və R.Qurbanov qabaqcadan əlbir olaraq, bir qrup şəxs halında təkrar özgənin külli miqdarda əmlakını oğurlayıblar.

Bundan əlavə R.Məmmədov və E.Aslanov satış məqsədi ilə qanunsuz olaraq külli miqdarda narkotik vasitə olan heroin əldə edərək saxlamaqda da günahlandırılırlar.

Cinayət işinin istintaqı zamanı müəyyən edilib ki, R.Məmmədov tanışı Vaqif Rəhimovla birgə 2006-cı ildə “Karvan L” şirkətinin ofisindən, ümumilikdə, 190 min 496 manat, 2008-ci ildə “Moqobs” MMC-nin ofisindən 158 min 594 manat, 2010-cu ildə “Saqa” gəmi təmiri şirkətinin ofisindən 40 min 800 manat, 2011-ci ildə “Təmizləmə avadanlıqlarının satışı mağazası”ndan 510 min manat məbləğində pul oğurlayıb.

2014-cu ildə də həbs edilən R.Məmmədov oğurluqda təqsirli bilinib və Bakı Ağır Cinayətlərinin hökmü ilə 4 il müddətinə azadlıqdan məhrum olunub. 2016-cı ildə isə o, Xətai Rayon Məhkəməsinin qərarı ilə 5 ay 17 gün çəkilməmiş cəzadan vaxtından əvvəl şərti azadlığa buraxılıb.

R.Məmmədov məhkumluğu götürülmədən və ödənilmədən yenidən cinayətə əl atıb.

Belə ki, o, 2016-cı ildə Rasim Əliyevə məxsus Bakı şəhəri ərazisində yerləşən ofisdən 7 min manat pul oğurlayıb. 2017-ci ildə isə R.Məmmədov Azərbaycan Dini Qurumlarla İş üzrə Dövlət Komitəsinin Bakı şəhəri üzrə şöbəsinin iş otağına qanunsuz daxil olub və şöbə müdrinə məxsus olmaqla içərisində möhür və blanklar olan 1050 manat dəyərində “FDX-30” markalı seyfi talayaraq aparıb.

Bundan başqa, o, Qadir Əliyevlə birgə Murad Bədirovun rəhbərlik etdiyi MCM şirkətinin ofisindən 8 min 253 manat, “Total İT” MMC-nin ofisindən 13 min 797 manat, “Azəri Ekspress” MMC-nin ofisindən Rauf Səfərovun 6 min 202 manatını, Vahel Abdullayevin isə 7 min 200 manatını, “İndeks.az” MMC-nin ofisindən 43 min 200 manat, 2017-ci ildə “Saqa” gəmi təmiri şirkətinin ofisindən 600 manat pul oğurlayıb.

R.Məmmədov daha sonra R.Qurbanov, E.Aslanov və qeyriləri ilə birgə 2017-ci ilin avqust ayının 10-da “M-Trans” MMC-nin ofisindən 15 min 500 manat, “MS Orbita” şirkətinin ofisindən 67 min 441 manat pulu gizli yolla oğurlayıblar.

R.Məmmədovla E.Aslanovun barəsində Cinayət Məcəlləsinin 177.3.2-ci (oğurluq, külli miqdarda), 234.4.3-cü (külli miqdarda narkotik) və R.Qurbanovun isə 177.3.2-ci maddəsi ilə ittiham irəli sürülüb.

Xatırladaq ki, R.Məmmədovla yanaşı, E.Aslanov da məhkumluq həyatı yaşayıb. O, 2012-ci ildə oğurluq və narkotikdə təqsirli bilinib və 4 il 6 ay müddəti ilə azadlıqdan məhrum edilib. E.Aslanov 2016-cı ildə isə azadlığa buraxılıb.