Avropa Parlamentində səsə qoyulacaq qətnamə layihəsində “Gürcü Arzusu” partiyasının lideri Bidzina İvanişvili, Gürcüstanın baş naziri İrakli Kobaxidze, parlamentin sədri Şalva Papuaşvili, partiyanın baş katibi Kaxa Kaladze və partiyanın sədri İrakli Qaribaşviliyə qarşı sanksiyalar tətbiq edilməsi tələb olunur.

Yenixeber.org: Bu barədə Formula TV məlumat yayıb.

Layihədə Gürcüstanda demokratik geriləmə, media şəraitinin pisləşməsi və siyasi məhbusların vəziyyəti barədə də danışılıb.

Bildirilib ki, Batumelebi və Netgazeti saytlarının təsisçisi Mziya Amaglobeli siyasi məhbuslar arasında göstərilib.

Müəlliflər, həmçinin Gürcüstan hakimiyyətinin müstəqil mediaya təzyiq göstərməsindən və hökumətə yaxın olan media sahiblərinə qarşı sanksiyalar tətbiq edilməsinin zəruriliyindən də danışıblar.

Avropa Parlamenti, Aİ və üzv dövlətləri, Gürcüstanda demokratiya, seçki saxtalaşdırılması və insan hüquqları pozuntularına görə baş nazir İrakli Kobaxidze, parlamentin sədri Şalva Papuaşvili, Tbilisi meri Kaxa Kaladze və İrakli Qaribaşvili də daxil olmaqla, bir sıra rəsmilərə qarşı sanksiyalar tətbiq etməyə çağırır. Həmçinin, siyasi təqiblər aparan məhkəmə hakimlərinə və dezinformasiya yayan dövlətə məxsus media sahiblərinə də sanksiyalar tətbiq edilməsi təklif olunur.

“Avropa Parlamenti yenidən Şura və üzv dövlətləri ABŞ və Birləşmiş Krallığa qoşulmağa və dərhal Bidzina İvanişvili və onun ailəsinə qarşı şəxsi sanksiyalar tətbiq etməyə, eləcə də onun Gürcüstandakı siyasi prosesi pisləşdirmədəki rolu və Konstitusiyada göstərilən avroatlantik inteqrasiyaya qarşı çıxması səbəbindən bütün aktivlərini Aİ-də dondurmağa çağırır”, — deyə qətnamə layihəsinin mətnində bildirilir.

Avropa Parlamenti, həmçinin Fransanı Bidzina İvanişvilini Şərəf Legionu ordenindən məhrum etməyə və ona qarşı şəxsi sanksiyalar tətbiq etməyə çağırır.

Sənəddə, həmçinin, müxalifətə aid telekanalların jurnalistlərinə peşə vəzifələrini yerinə yetirərkən edilən hücumlara da diqqət çəkilir.

12 yanvar tarixində Gürcüstan hakimiyyətinin nümayəndələri siyasi motivli ittihamlarla jurnalist Mziya Amaglobelini saxlayıb.

Qeyd edək ki, jurnalist o vaxtdan bəri müvəqqəti həbsdədir və Gürcüstandakı bütün siyasi məhbuslarla həmrəyliyini göstərmək üçün aclıq aksiyası keçirir.