Yenixeber.org: Bu barədə redaksiyamıza türk iş adamı Mütallib Tekiş məlumat verib.
O, bildirib ki, Baş nazirin keçmiş müavini Əli Həsənovun nəvəsi Nail Allahverdiyevin 2017-ci il avqustun 3-də Heydər Əliyev prospektində törətdiyi ağır qəzadan zərərçəkmişlərə təzminat ödəməkdən imtina etdiyinə görə, noyabrın 16-da Apelyasiya Məhkəməsində Nail Allahverdiyevin mal varlığına həbs qoyulub.
Tekişin sözlərinə görə, qəzadan sonra həm özü, həm də həyat yoldaşı Söngül xanım çox ağrılı günlər yaşayıblar. Şikayətçi bildirib ki, iki ilə yaxındır gedən məhkəmə proseslərində onların tələbləri qismən təmin edilib. Lakin Tekiş ailəsinin Nərimanov Rayon məhkəməsində qaldırdığı vəsait qismən təmin edildiyi və Əli Həsənovun onlara vəd etdiyi təzminatı həyat yoldaşının 1 il 5 aylıq müalicə puluna hesablanaraq, məhkəmə Həsənovu bütün öhdəliklərdən azad etmək barədə qərar çıxarıb. Məhkəmənin bu qərarından razı qalmayan Mütallib Tekiş Apelyasiya məhkəməsinə şikayət edib.

Noyabrın 16-da keçirilən prosesdə isə Nail Allahverdiyevin zərərçəkənlərə təzminat ödəməkdən boyun qaçırdığı üçün mal varlığına həbs qoyulub.
Belə ki, Tekiş cütlüyünə dəymiş ziyanı ödəmək qarşılığında şikayət etməməkləri haqqında saziş imzalayan Həsənov ailəsi, bir müddət onların müalicəsini ödədikdən sonra məsuliyyətdən boyun qaçırıb. Bundan sonra ailə məhkəməyə təkrar müraciət etməli olub. 
Mütallib Tekiş bildirib ki, məhkəmə son qərarını noyabrın 23-də keçirilən prosesdə verəcək:
“Noyabrın 23-də keçirilən prosesdə hakim yekun qərarı elan edəcək. Qarşı tərəf verilən qərardan heç məmnun deyil. Həsənovlar ailəsinin vəkili Muxtar Musayev çıxışlarında hər zaman olduğu kimi aqressiv idi. Hətta hakim ona bu barədə xəbərdarlıq da edib. Noyabrın 8-də biz həyat yoldaşımın müalicəsinin uzun müddət davam edəcəyi barədə arayışı məhkəməyə təqdim etmişik və bununla bağlı qərarı səbrsizliklə gözləyirik”.
Sonda Mütallib Tekiş bildirib ki, Apelyasiya məhkəməsinin qərarı onları qane etməsə, Ali Məhkəməyə müraciət edəcək.
Lazım gəlsə, haqlarını təmin etmək üçün Avropa İnsan Hüquqları Məhkəməsinə qədər gedəcəklər:
“Çünki yoldaşımın səhhətində çox ciddi problem var, mütləq müalicə alıb və mütəmadi fizeoterapiya olmalıdır. O, bu qəzadan sonra 80% əlil olub”.(Bizim.media)