AZ
RU
"Özütək sanır"Təranə Şəms
Özütək sanır
Dilinin altında gizlənmə daha,
Bükülüb, açılsan sən həmin osan!...
Kölgənin fonunda izlənmə daha,
Mümkünmü dəyişmək, sən həmin osan!...
Milçək də darışır iylənmiş ətə,
İstəyi nə isə xisləti odur.
Önünə qoysan da, qaymaqlı kətə
Dəyişməz, dəyişməz fitrəti odur.
Allahdan ətadır bu fitrət ona,
Aranı qatmağa fürsət gözləyər.
Girsə də yüz cildə, biçimsiz dona,
Bir kölgə görünsə baxma göz dəyər.
Yalanı dilində ölçü-biçisiz,
Sözündə boyağın rəngləri çoxdur.
Önündə insanı özütək sanır,
Bilməz ki, yalana gözümüz toxdur.
Kəlmənin boyağı rəssamı sənsən,
Kiməsə tanıtmaq heç gərək deyil.
Tutulub, açılan dumanlı çənsən,
Öyünmə, öyünmə heç fərəh deyil...
