AZ
RU
.jpg)
Həqiqət yalanla doğulur sanki
Yalanın yükünü daşımaq olmur,
Ruhunu incidər, dilin yorular.
Qan verən yaranı qaşımaq olmur,
Dərinə hoparsa, cana sovrular.
Əzəldən pozulub həyatın dəmi,
Elə bil bu dünya fırlanmır daha.
Sahildə dalğanı ram edən gəmi,
Axınla irəli yollanmır daha.
Səsində heyrət var, boğulur sanki,
Özündə, özünü batırmaq üçün.
Həqiqət yalanla doğulur sanki,
Tarixə yalanı sırımaq üçün.
Dilimiz qıfıllı, sözlər şifrəli,
Namusu pay kimi yeyənlər bilər.
Bizimsə bu bəla, niyə gülməli?...
Sinə verib özünü öyənlər bilər.
Adi hal deyil ki, baxmaz olasan,
Əgər dərd bizimsə, yan keçim demə!
Ağlının ucuna taxmaz olasan,
Mən yandım, sən də yan, “yan”, keçim demə!...
Cavablar mürəkkəb, sadə deyil ki,
Kökündə nələr var anlamaq gərək.
Anlayan, ağıllı, gadə deyil ki?!...
Sus deyib sadəcə danlamaq gərək!..
Təranə Şəms.28.06.2018
