AZ
RU
Düyülmür axı
Zamana qarşıyam, dayansın zaman,
Yuxu var əbədi, oyansın zaman!
Rəvamı, qanına boyansın zaman?
Bu zülmün ölçüsü bilinmir axı...
Gözlərdə qorxu var, dildə bir sükut,
Nitqimdi lal, baxış eldə bir sükut,
Çaylar da axmayır, seldə bir sükut,
Alnıma yazılan silinmir axı...
Soz ilə danışsam qapım bağlanar,
Çat versəm yüz yerdən, çatım bağlanar,
Yüyənsiz, buxovsuz atım bağlanar,
Buğda dəyirmansız üyünmür axı...
Baş ki, var, içini görmək olmayır,
Bir insan vəhşisə, dözmək olmayır,
Qanmazın hökmüylə ölmək olmayır,
Açılan kələflər düyülmür axı...
Dirəniş etsəniz, qələbə sizin!
Vətən var, torpaq var, mələfə sizin!
Toxunsan kələfə, kələf də sizin,
İlmələr sıraya düzülmür axı...
Təranə Şəms.16.05.2018
_1734699535.jpeg)
