Bəhri təvil

Yenixeber.org: Söz ki, sənin, baxan vurur, axan vurur, əli ələ çaxan vurur, deyirlər ki, qeyrət itib,  nə vaxt ki, bəs qılınc durub qalxan vurur. Daşa dönüb daş olmuşuq, niyə, nədən baş olmuşuq, divar kimi sədd çəkilib, bənd çəkilib, ürəklərə dərd əkilib, kim deyir ki, yatmış olan xoruldamır, hər yerindən qalxan vurur!?...  Qardaş-bacım, a millətim!!!... zarıldama, yazıq olma, zatını danıb fasiq olma, öz eybinə bənd oluban, məşuq olub  aşiq olma, qəm-kədərə sevə-sevə sadiq olma...Bax belədir, düşün bir az, şaxta, sazaq soyuq bilib üşün bir az, onun-beşin az görünür, üçün bir az, az demərəm, nə az, nə çox, yükün bir az, kefin də çağ, əlində saz. Biz beləcə baxmalıyıq, yatmalıyıq, oyansana, dildə bizim, dəvə böyük, fil də bizim, səsimiz var, zildə bizim, ömür gedir üstələyən il də bizim. Nə durmuşuq, biz baxırıq, harda gəldi çuxur tapdıq biz axırıq, hərdən-hərdən guruldayıb buludsuz da biz çaxırıq... Dildə yalan, sözdə yalan, gözdə yalan, hardan olduq az öyrənib çox da qanan, axı bizik zat unudub nəsil danan, deyim ki, var yaxşı yaman... şum edərik, cücərdərik yerindəcə elə haman. Haman-haman baş olmayır, göz var isə yaş olmayır, döyülməyən düyü varsa, yaxşı aşpaz, yağ olsa da, aş olmayır, tapdaq olan torpaq olar, bərkiməsə daş olmayır, gözəl üzün olsa sənin, kirpik yoxsa, qaş olmayır. Anlayana çəkib yayı ox atmışam, hədəf bəlli, yeri məlum  çox atmışam, bilməyin ha.... əldə qələm sizin kimi mürgü vurub şirin-şirin mən yatmışam. Suda gəmim xod işləyir, neft yerinə kömür yanır, od işləyir, mən demədim dalğalara baş vuruban  batmışam. Qələm ki, var o qorxmayır, mən deyirəm, siz də bilin, söz oxumu kimə, nəyə, harda, nə vaxt, bax beləcə çəkinmədən atmışam........

Təranə Şəms