19710,4 min manat dövlət vəsaitinin müəmmalı taleyi...

Xeberinfo.com: Quba rayonunda müxtəlif sahələr üzrə dövlət vəsaitinin yumşaq desək səmərəsiz xərclənməsi ilə bağlı mətbuatda silsilə yazılar yer almaqdadır. Bu yazılardan biri də xeberinfo.com-un Quba səhiyyəsi ilə bağlı özəl araşdırması idi. Bu araşdırma yazımız həm rayon ictimaiyyəti, həm də aidiyyatı dövlət strukturları tərəfindən maraqla qarşılanmışdır... Bu gün isə Hesablama Palatası Dövlət büdcəsinin dövlət əsaslı vəsait qoyuluşundan Quba Rayon İcra Hakimiyyətinə ayrılan vəsaitlərdən istifadəyə dair auditin nəticələrini açıqlayıb:

“Audit 2014-2015-ci illərdə Quba  Rayon İcra Hakimiyyəti tərəfindən Afurca kənd 120 və Qımılqışlaq kənd 220 şagird yerlik tam orta məktəblərinin tikintisi, Quba rayonu Rustov-Xanəgah-Gürdah, Rustov-Nöydün-Şuduq, Rustov- Məcgəxacə, Rustov-Bağçəli-Yekdar avtomobil yollarının tikintisinə  istifadə olunan ümumilikdə 19710,4 min manat vəsaiti əhatə etmişdir.

Müəyyən edilmişdir ki, Quba RİH tərəfində Azərbaycan Respublikası Prezidentinin 2010-cu il tarixli 17 mart tarixli 239 nömrəli Fərmanı ilə təsdiq edilmiş “Azərbaycan Respublikası Dövlət İnvestisiya Proqramının tərtibi, icrası, monitorinqi və qiymətləndirilməsi Qaydaları”nın tələblərinə əməl edilməyərək layihə təklifləri verilməzdən əvvəl tikinti layihələrinin əsaslandırılması, ilkin strukturunu və qiymətləndirilməsini əks etdirən ilkin texniki-iqtisadi əsaslandırma və layihə sənədləri hazırlanmamış, qüvvədə olan qaydaların tələblərinə əməl edilməyərək  Afurca kənd 120 şagird yerlik tam orta məktəbinin tikintisində akt zalının, fizika kimya laboratoriyalarının, kitabxananın, Qımılqışlaq kənd 220 şagird yerlik ümumi orta məktəbinin tikintisində isə idman zalının, fizika və kimya laboratoriyalarının, akt zalının və kitabxananın sahəsi təsdiq olunan normalardan az layihələndirilmişdir.

Afurca kənd 120 və  Qımılqışlaq kənd 220 şagird yerlik məktəblərinin tikintisi başa çatdırılıb 2014-cü ilin sentyabr ayından  istifadə olunmasına baxmayaraq mövcud  qaydaların tələbinə uyğun  istismara qəbulu  və çəkilən məsrəflərin müvafiq qaydada uçota alınması  təmin edilməmiş, obyektlər üzrə daxili və xarici su, kanalizasiya və istilik xətlərinin quraşdırılması  işlərinə sınaq aktları tərtib edilməmişdir.

“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” Dövlət Proqramları üzrə təsdiq olunmuş Tədbirlər Planındakı Rustov-Xanəgah-Gürdəh, Rustov-Növdün-Şuduq, Rustov-Məcgəxacə, Rustov-Bağçalı-Yekdar yollarının tikintisinin nəzərdə tutulmuş qrafik üzrə başa çatdırılmadığı müəyyən edilmişdir.

Yolların tikintisi zamanı texniki təminat müddəti nəzərə alınmadan son ödəmə həyata keçirilmiş, istifadə olunmasına baxmayaraq istismara qəbulu təmin edilməmiş, dəmir-beton siqnal dirəkləri quraşdırılmamış, yolun müəyyən hissələrində bərkidilmə işləri yerinə yetirilməmişdir.

Quba  Rayon İcra Hakimiyyəti üzrə vəsaitlərin uçotu və maliyyə hesabatlarının tərtibi zamanı qüvvədə olan “Büdcə təşkilatları üçün Milli Mühasibat Uçotu Standartları” və “Dövlət büdcəsindən maliyyələşən təşkilatlarda büdcə təşkilatları üçün Milli Mühasibat Uçotu standartlarına uyğun olaraq mühasibat uçotunun təşkili və aparılmasına dair təlimat”ın tələblərinə əməl olunmamış, kapital qoyuluşuna yönəldilən vəsaitlərin isə ümumiyyətlə uçotu aparılmamışdır.

Hesablama Palatasının Kollegiyası Quba Rayon İcra Hakimiyyəti tərəfindən yol verilmiş nöqsanların əsasən audit zamanı aradan qaldırılmış nöqsanlar nəzərə alınmaqla müəyyən edilmiş digər nöqsan və çatışmazlıqların qısa müddət ərzində aradan qaldırılması barədə Qərar qəbul etmiş, icra edilməsi və  görülmüş tədbirlər haqqında Hesablama Palatasına məlumat verilməsi  üçün Qərarın surəti Quba Rayon İcra Hakimiyyətinə və “Azəravtoyol” Açıq Səhmdar Cəmiyyətinə göndərilmişdir.

“Azəravtoyol” Açıq Səhmdar Cəmiyyəti tərəfindən təqdim edilmiş məlumatlara görə, trassanın dəyişdirilməsi, tikinti işlərinin dağ şəraitində yerinə yetirilməsi, asfalt-beton işlərinin qış fəslində aparılması nəzərə alaraq başa çatdırılmamış işlərin dəyəri müəssisədə avans kimi uçota alınmışdır”.