«ANS hər zaman hakimiyyətin bir qolu ilə konfliktdə olub. Lisenziyasının geri alınması da bununla bağlıdır».

Xeberinfo.com:   «Turan» İnformasiya Agentliyinin direktoru Mehman Əliyev ANS televiziyasının məhkəmə yolu ilə bağlanmasını belə şərh edir. O xatırladır ki, 2006-cı ildə də ANS-in qapısı möhürləndi: «Az qalmışdı ki, bağlansın. Biz son vaxtlar Milli Teleradio Şurasının ANS-ə qarşı mütəmadi qərarlar çıxarmasının şahidi oluruq. Ancaq Şuranın ANS-lə bağlı mövqeyini başqa kanallara görmürük, halbuki digər telekanallarda kifayət qədər qanun pozuntusu var».

M.Əliyev hesab edir ki, ANS-in bağlanması hakimiyyətdəki bir qrupun istəyidir və buna nail olundu. Onun fikrincə, Türkiyə olayları, Fethullah Gülen məsələsi bəhanə kimi ortalığa atılıb: «2006-cı ildə məhkəmə qərarı yox idi, bu dəfə isə məhkəmə yolu ilə lisenziyasını geri aldılar. Açılacağını güman etmirəm».

«BU, GÖRÜNTÜ İDİ»

ANS prezidentə, ailəsinə hər zaman loyal münasibət göstərib, hətta bir neçə dəfə ölkə başçısı İlham Əliyevi «İlin adamı» elan edib.

«ANS bu görüntünü yaradıb, sanki ölkə rəhbərliyinin telekanala münasibəti yaxşıdır fikrini formalaşdırmağa çalışıb. Əslində isə hakimiyyət ANS-in mövcudluğunu istəmirdi», – M.Əliyev deyir.

Müsahibimiz bunu onunla izah edir ki, ANS tənqidi televiziya olmasa da, jurnalistika prinsiplərini digər televiziyalarla müqayisədə daha çox qorumağa çalışırdı: «Hakimiyyət isə azacıq müstəqilliyi belə qəbul etmir – ya mən istəyən kimi işləyəcəksən, ya da bağlanacaqsan».

İyulun 15-də Türkiyədə dövlət çevrilişi cəhdindən sonra ANS-in efirində terrorizmə dəstək xarakterli materiallar yayımlandığı əsas gətirilərək telekanal bağlanıb.

Avqustun 29-da Bakı Apellyasiya Məhkəməsi ANS Müstəqil Yayım və Media Şirkətinə 2013-cü ilin oktyabrında verilmiş lisenziyanı ləğv edib. (azadliq.org)