Aprelin 30-da Səbail rayonunda yerləşən 239 nömrəli tam orta məktəbdə şagirdlər arasında münaqişə baş verib.

Yenixeber.org: Əldə etdiyimiz məlumata görə, məktəbin 7-ci sinif şagirdləri arasında baş verən münaqişə bir nəfərin qol və ayaq nahiyəsindən xəsarət alması ilə nəticələnib.

Hadisə ilkin olaraq məktəbin direktoru Nisə Fərəcova tərəfindən hüquq-mühafizə orqanlarından və şagirdin valideynlərindən gizlədilib.

Sözügedən şagird evə gəldikdən sonra bədənində olan xəsarətlər valideynlər tərəfindən aşkar olunub və uşaq dərhal xəstəxanaya aparılıb. Xəstəxanaya aparılan şagirdə ilkin tibbi yardım göstərildikdən sonra o, evə buraxılıb.

Məktəblərdə şagirdlərin təhsil almasını təmin etməklə yanaşı, eyni zamanda sağlam təhsil mühitinin qorunması da təmin edilməlidir. Şagirdlər arasında nizam-intizam, onların fiziki və psixoloji olaraq mühafizəsi də dərs saatları əhatəsində məhz məktəbin məhsuliyyətindədir. Lakin görünən odur ki, məktəblərdə şagirdin xəsarəti ilə nəticələnək dərəcədə münaqişə baş verir və məktəb rəhbərliyi hadisəni gizlətməyi üstün tutur…

  ***

DİN-in Mətbuat Xidmətinin əməkdaşı Elbrus İbrahimov bildirdi ki, məsələ ilə bağlı ərazi polis orqanına müraciət daxil olub. Araşdırma aparılır.(patrulaz.az)