Altı aydır ki, Qəzzada davam edən müharibədə təxminən 26 min uşaq öldürülüb və ya yaralanıb.

Yenixeber.org: Bu barədə "Save the Children" beynəlxalq humanitar təşkilatı məlumat yayıb.

"BMT-nin Humanitar Məsələlər üzrə Koordinasiya Ofisi və Qəzzadakı səhiyyə qurumunun verdiyi məlumata görə, orada 13800-dən çox, İordan çayının qərb sahilində 113 uşaq öldürülüb, Qəzzada 12009-dan çox uşaq, İordan çayının qərb sahilində isə ən azı 725 uşaq yaralanıb. UNICEF ən azı 1000 uşağın bir və ya hər iki ayağının amputasiya edildiyini və 36 xəstəxanadan təxminən 30-nun bombardman olunduğunu və yalnız 10-unun qismən işlək vəziyyətdə qaldığını bildirib.

Qəzzada təhsil də hücuma məruz qalır. Burada 625 000 qeydiyyatdan keçmiş şagird var, lakin bombardmanlar və hərbi əməliyyatlar bütün məktəb binalarının təxminən 90%-nin zədələnməsinə və ya dağılmasına səbəb olduğu üçün oktyabr ayından bu yana heç bir uşaq rəsmi təhsil almayıb. Təxminən 261 müəllim öldürülüb və 1,4 milyon insan hazırda məktəblərdən sığınacaq kimi istifadə edir", - məlumatda qeyd olunub.

"Save the Children" təşkilatı 7 oktyabrda HAMAS-ın İsrailin cənubuna hücumu nəticəsində 33 uşağın öldürüldüyünü qeyd edib.