Sentyabrın 28-də Mərkəzi Asiya Regional İqtisadi Əməkdaşlıq (CAREC) Proqramının Gömrük Əməkdaşlığı Komitəsinin 20-ci iclası keçirilib.

Yenixeber.org: Bu barədə Dövlət Gömrük Komitəsi (DGK) məlumat yayıb.

Videokonfrans formatında təşkil olunan tədbirə DGK-nın sədr müavini, gömrük-xidməti general mayoru Cavad Qasımov sədrlik edib. İclasda Azərbaycan ilə yanaşı, CAREC üzv ölkələrinin nümayəndələri, eləcə də Asiya İnkişaf Bankının, Ümumdünya Gömrük Təşkilatının və BMT-nin Avropa İqtisadi Komissiyasının ekspertləri iştirak ediblər.

C.Qasımov iclası açıq elan edərək bildirib ki, tədbirin əsas məqsədi ticarətin asanlaşdırılması və sərhəd-keçid proseslərində davamlı təchizat zəncirinin təmin edilməsi, pandemiya və postpandemiya dövründə avtomatlaşdırılma prosesləri və innovativ texnologiyalar, kağızsız ticarətin tətbiqinə dair fəaliyyət, "CAREC inteqrasiya edilmiş Ticarət gündəliyi 2030" və onun "2021-2023-cü illər üçün Strateji Fəaliyyət Planı", eləcə də digər aidiyyəti məsələlər ətrafında müzakirələrin aparılmasından ibarətdir. Vurğulanıb ki, xüsusilə, müasir dövrün tələblərini nəzərə alaraq ticarət təchizat zəncirində həyata keçirilən əməliyyatlar zamanı artıq süni intellektin tətbiqinə yer verilməsi və bu istiqamətdə həyata keçirilən işlərin daha yüksək səviyyədə yerinə yetirilməsi vacibdir.

Tədbirdə CAREC üzv ölkələrinin nümayəndələri tərəfindən (Azərbaycan, Çin, Gürcüstan, Monqolustan, Pakistan, Türkmənistan, Tacikistan, Özbəkistan, Qazaxıstan) gömrük sistemlərində həyata keçirilən yeniliklər, səlahiyyətli iqtisadi operator səlahiyyətlərinin genişləndirilməsi, elektron "Bir pəncərə" sisteminin tətbiqi, gömrük nəzarəti və gömrük rəsmiləşdirilməsi sahəsində tətbiq edilən rəqəmsal layihələr barədə ətraflı məlumatlar iclas iştirakçılarının diqqətinə çatdırılıb. Həmçinin, iclasda COVİD-19 pandemiyası və post-pandemiya dövründə ticarət təchizat zəncirinin davamlılığının təmin edilməsi və sərhədlərarası ticarətə zərbə vura biləcək planlaşdırılmamış hadisələrin öncədən qarşısının alınması istiqamətində həyata keçirilməli olan tədbirlərə dair məlumatlar müzakirə edilib.

İclasda DGK-nın nümayəndəsinin təklifinə əsasən Asiya İnkişaf Bankı və CAREC İnstitutunun dəstəyi çərçivəsində elektron "bir pəncərə" sisteminin Azərbaycan və digər CAREC üzv dövlətləri tərəfindən tətbiqinin layihələndirilməsi məsələsinə baxılması qərarlaşdırılıb. Eləcə də CAREC nümayəndəsinin təklifi ilə "CAREC-in təkmilləşdirilmiş tranzit sisteminin və məlumatların ümumi mübadiləsinin pilot yoxlanılmasına dair üçtərəfli Saziş" layihəsinin Azərbaycan ilə Gürcüstan arasında imzalanması istiqamətində işlərin başlanılmasına dair qərar qəbul edilib.