Bakıda gündəlik avtobusdan istifadə vətəndaşlar yeni problemlə üzləşiblər. Belə ki, bir çox avtobusda sürücü ilə sərnişinlər arasında mübahisə yaranıb.

Yenixeber.org: Sərnişinlər sürücülərdən havanın isti olması və içəridə nəfəs almağın (maska ilə) ağırlaşması səbəbindən kondisionerləri yandırmağı tələb edib.

Amma sürücülər kondisionerlərin qoşulmadığı üçün işləmədiyini bildiriblər. Mövcud problemlə bağlı Bakı Nəqliyyat Agentliyinin Mətbuat xidmətinin rəhbəri Mayis Ağayev  bildirdi ki, adətən sərinləndirmə sistemləri yay mövsümü başlayan zaman yəni 15 iyundan işə salınır:

"Amma buna qədər havanın tempuratur göstəriciləri nəzərə alınmaqla işə salınması mümkündür. Əvvəlki illərdə belə bir təcrübə olub. İndiki halda isə məlum olduğu kimi bir neçə müddətdir, havalar sərin keçir. Belə olan halda pəncərələri açıq saxlamaqla havalandırmanı təmin etmək mümkündür.

Həmçinin əgər qeyd edildiyi kimi sərnişinlərimizi narahat edən məqam varsa, buna uyğun qərar qəbul ediləcək. Avtobuslardakı sərinləndirmə və isitmə sistemləri sərnişinlərimizin rahatlığı üçündür. Buna zərurət olacaqsa, işə salınacaq".