AZ
RU
Travmatologiya inisitutunda ÖZBAŞINALIQ -rüşvət verə bilməyən xəstəyə ''xərçəng diyaqnozu'' qoyuldu
Bütün bunlar uğur gətirən addımlar olsa da, hal-hazırda Azərbaycan səhiyyəsində yaşanan biabırçılıqların, minbir oyun qaydalarının, hər cür avantürist əməllərin və s. varlığını eşitdikcə, sanki dəhşətə gəlirik.
Çünki, 19 may 2020-ci il tarixdə Qarabağ müharibəsi veteranı Bakı şəhəri, Nəsimi rayonu, Abbas Səhhət-32 ünvanında fəaliyyət göstərən Elmi-Tədqiqat Travmatologiya və Ortopediya İnstitutunun əl cərrahiyyəsi şöbəsində başına gətirilən müsibətlərin varlığı onu söyləməyə əsas verir ki, bu gün də Azərbaycan səhiyyəsinə “üzqaralığı gətirən” bəzi həkimlərimiz var. Məhz onlardan biri də, Travmatologiya və Ortopediya İnstitutunun əl cərrahiyyəsi şöbəsində çalışan Akif həkimdir.
Bir anlığı diqqət yetirək ki, DQ müharibəsi veteranı öz sağlamlığını Vətən yolunda itirmiş və qolunun birinə yığılmış çirkli suyu əməliyyat etdirib götürdürmək istədikdə, Akif həkim bu şəxsdən istədiyi məbləğdə “haqq-hesab” almaq üçün “minbir dona” girir və hər cür avantürist əməllərə də qol qoyur. Belə olan halda o, Gundemxeber.Az saytına müraciət etmək qərarına gəlir ki, adı çəkilən bu səhiyyə müəssisəsində başına gətirilən müsibətlərdən geniş ictimaiyyət xəbərdar ola bilsin.
Elə ki, müharibə veteranı redaksiyamıza etdiyi müraciəti dinləyib baş verənlərdən az-çox xəbərdar olduq, o halda dəhşətə gəldik. Yəni, bu şəxs qolunda əmələ gəlmiş çirkli suyu əməliyyat etdirib götürtmək üçün, ilk əvvəl Travmatologiya və Ortopediya İnstitutunun əl cərrrahiyyəsi şöbəsinə müraciət edir. Həmin gün bu şöbənin müdiri, tibb elmləri doktoru Fikrət Qafarov iş yerində olmadığından, onu şöbədə çalışan Akif həkim qəbul edir və az sonra o, xəstəyə əməliyyatın vacib olduğunu və bununla bağlı razılıq verildiyini də dilə gətirir. Ümumi söhbət əsnasında Akif həkim xəstəyə belə bir əməliyyatın 800 AZN-ə başa gələcəyini, həmçinin əməliyyatdan əvvəl və sonra dərman, iynə, sistem almağa, hətta süpürgə, zibil və s-yə görə ödəniləcək əlavə xərclərin 700 AZN olacağını bildirir. Yəni, bura dövlət xəstəxanası olmağına baxmayaraq, belə bir əməliyyatın üstüstə 1500 AZN-ə başa gələcəyini vurğulayır.
O, Akif həkimin bu cür tələb-şərti ilə razı olmur və bu əməliyyata görə cəmi 500 AZN verə biləcəyini bildirir. Qarabağ döyüşçüsünün verdiyi cavab Akif həkimi heç cür qane etmir, o halda həkim ona “sən mütləq UZİ-dən keçməlisən, baxıb görək səndə onkoloji xəstəliklə bağlı hansısa problem var, ya yox” deyir. Həmin an xəstə ona “iki-üç gün bundan öncə Milli Onkologiya Mərkəzində olmub KT-dan keçmişəm və məndə heç bir problemin olmadığını deyiblər”. Belə bir cavabın qarşılığında Akif həkim “sən mütləq bizdəki UZİ-dən keçməlisən” deməklə, bir növ xəstəni bu yöndə addım atmağa təkid edir. Çıxılmaz duruma düşən xəstə həkimin təkidlərinin qarşılığında müəyyən qədər xərc çəkib, Travmatologiya və Ortopediya İnstitutundakı “UZİ”dən keçir. O halda xəstəni başlarından etmək üçün “səndə onkoloji problem var” deyə cavab verirlər. Çox keçmir ki, bu cür iyrənc və avantürist durumla üz-üzə qalan veteran xəstəxananı tərk etməli olur.
Elə ki, saytımızın əməkdaşı DQ müharibəsi veteranının redaksiyamıza etdiyi müraciəti əsasında Travmatologiya və Ortopediya İnstitutu əl cərrrahiyyəsi şöbəsinin müdiri Fikrət Qafarovla görüşür və yaşananlarla bağlı müəyyən müzakirələr aparır, o halda şöbə müdiri “mən həmin vaxt xəstəxanada olmamışam və baş verənlər haqda Akif həkimdən müəyyən məlumatları əldə etsəm də, yaşanan problemlərin mahiyyəti haqda tam dəqiq məlumatım yoxdur” deyir. Bir sözlə, Fikrət Qafarovla söhbət zamanı bəzi mətləblərə aydınlıq gətirilir və şöbədə çalışan Akif həkimin yalan və fırıldaq əməllərinin mahiyyəti bəlli olur. Maraqlı hal o olur ki, şöbə müdiri Akif həkimi yanına çağıran zaman əməkdaşımız ona “sən hansı əsasla bir əməliyyata görə xəstədən 1500 AZN pul istəmisən deyə sual verdikdə “sən mənimlə pul söhbəti etmə” deyir. Əməkdaşımız dərhal ona “sən xəstədən pul tələb etmisən, indi də mənimlə pul söhbəti etmə” deyirsən. Az sonra əməkdaşımız Akif həkimin iş otağında onun özü ilə görüşüb söhbət edir və digər xəstələrin ifadə etdikləri narazılıqları canlı şəkildə də görür. Düşündürücü hal o olur ki, o, əməkdaşımızla söhbət edərkən “mənim qohumlarım MM-də işləyir, elələri də var ki, jurnalistdirlər” desə də, söhbətin sonunda “müəllim, biz xəstənin qolundakı çirkli suyu əməliyyat edib götürə bilərik, amma sümüyə çatdıqda isə, nəsə etməyi bacarmayacağıq” deyir. Bu da o anlama gəlir ki, hələ də Travmatologiya və Ortopediya İnstitutunda bu cür savadsız və bacarıqsız həkimlər çalışmaqda davam edirlər. Onu da unutmaq olmaz ki, ölkəmizin ərazisində koronovirus (COVİD-19) infeksiyası yayıldığı ilk vaxtlarda hər kəsin, o cümlədən cənab İlham Əliyevin də həkimlərimizdən gözləntilərinin çox olduğu dilə gətirildi. Akif həkimin belə bir yanaşması və söylədiyi açıqlamaların varlığı isə, həkim auditoriyasına olan inamın heçə enməsi deməkdir.
Xüsusi vurğulanası hal odur ki, Qarabağ döyüşçüsü Travmatologiya və Ortopediya İnstitutundan narazı şəkildə çıxıb getsə də, o, çox keçmir ki, başqa bir səhiyyə müəssisəsinə müraciət etməli olur. Həmin vaxt həkim onu əməliyyata götürülməzdən öncə, tam sağalacağı yöndə zəmanət verir və həyata keçirilmiş əməliyyat da uğurla başa çatır. Nəzər-diqqəti o halın varlığına da yönəldək ki, Travmatologiya və Ortopediya İnstitutunun əl cərrahiyyə şöbəsinə professor Çingiz həkim rəhbərlik edərkən heç vaxt belə bir biabırçılıqlar, bu cür həngamələr baş verməyib, hansısa avantürist addımlar atılmayıb. Hal-hazırda adı çəkilən bu şöbədə isə, hər cür iyrəncliklərə qol qoymaq, xəstələri müxtəlif yollarla “dəridən-qabıqdan soymaq” və s. kimi addımları atmaq, sanki adi hala çevrilib.
Mövzunu diqqətdə saxlayacağıq.(gundemxeber.az)
