Yenixeber.org: Beş gün əvvəl (07-02-2020-ci il tarixdə) saytımızda dərc olunan "Makarenko adına Gimnaziyada dövlət vəsaiti belə “yuyulub içilir”-NONSES" sərlövhəli yazıya qarşı tərəfdən cavab verilib. Xatırladaq ki, yazıda sözügedən təhsil ocağının içməli və texniki su ilə bağlı təminatından və bu məqsədlə elan olunmuş müsabiqədən bəhs olunurdu.

Bu gün isə A.S.Makarenko adına Respublika Humanitar Fənlər Təmayüllü Gimnaziyadan yazıda yer alan faktlarla bağlı redaksiyamıza cavab məktubu daxil olub. Məktubda Gimnaziyanın içməli və texniki suya təlabatına və bu istiqamətdə həyata keçirilən işlərə aydınlıq gətirilir. Məlum qanun və prinsiplərə uyğun olaraq məktubu olduğu kimi dərc edirik: 

"Bildiririk ki, A.S.Makarenko adına Humanitar Fənlər Təmayüllü Gimnaziyada 612 şagird təhsil alır. Gimnaziyanın 1 dördmərtəbəli tədris binası , 2 üçmərtəbəli yataqxanası, qazanxanası, yeməkxanası və çamaşırxanası vardır. Burada təhsil alan şagirdlərin əksəriyyəti Respublikanın müxtəlif rayonlarından olduqları üçün yataq yeri ilə təmin olunurlar. Şagirdlərin gündəlik içməli su təminatı, onların sanitar –gigiyenaları , paltarlarının,yataq dəstlərinin yuyulması işi və həmçinin yeməkxanada görülən işlər daşınan içməli və texniki suyun hesabına həyata keçirilir. Həmçinin bildiririk ki, gimnaziyanın ərazisində 150-dən çox bəzək bitki kolları və 1,5 hektar yaşıl ot örtüyü vardır. Yaşıl ot örtüyü yay aylarında hər gün (qazon) içməli su ilə suvarılır.

Məlumat üçün bildiririk ki, gimnaziya Xəzər dənizinın yaxınlığında

yerləşdiyindən buradakı artezian quyularındakı su şordur və istifadəyə tam yararsızdır.

Yuxarıda qeyd olunanları nəzərə almağınızı və informasiya portalınızda gimnaziya haqqında aydınlıq gətirməyinizi xahiş edirik."