ABŞ-ın 13 senatoru Səudiyyə Ərəbistanının vəliəhdi Məhəmməd bin Salmana məktub göndərib.

Yenixeber.org: Bu məlumatı “Blomberq” agentliyi yayıb. Məlumata görə, senatorlar vəliəhddən neft hasilatının kəskin artırmasını dayandırmasını istəyiblər.

Senatorlar həmçinin neft bazarının çökməsinin iki ölkə arasında uzunmüddətlik strateji tərəfdaşlığı parçalayacağına eyham vurublar:

“ABŞ uzun illər Səudiyyə Ərəbistanını dəstəkləyib, qarşılığında krallıq dünya neft bazarında stabilliyə zəmanət verib. Biz krallığı dünya iqtisadiyyatından konstruktiv rol oynamağa və neft-qaz sektorundakı təşvişi azaltmağa çağırırıq”.

Məktuba ancaq Respublikaçılar Partiyasının senatorlarının imza atdığı bildirilib.

Qeyd edək ki, OPEK+ çərçivəsində Rusiya ilə razılaşma əldə edə bilmədikdən sonra Səudiyyə Ərəbistanı neft hasilatını artırmağa başlayıb. Nəticədə dünya birjalarında neftin qiyməti kəskin şəkildə ucuzlaşıb. Bu isə maya dəyəri yüksək olan ABŞ-ın slans neftinin bazardan sıxışdırılması ilə müşayət olunur.