AZ
RU
NİDA-çıların valideynləri aclıq aksiyasını dayandırdılar
xeberinfo.com: Müsavat Partiyasının qərargahında aclıq aksiyası keçirən NİDA Vətəndaş Hərəkatının həbsdə olan 8 gənc üzvünün valideynləri dünən aksiyanı dayandırdılar. Valideynlər aksiyanın dayandırılmasına səbəb kimi övladlarının həbsxanadan etdikləri xahişləri və onların məhkəmələrində iştirak etmək istəklərini göstəriblər.
Tədbirdə çıxış edən NİDA-çı Zaur Qurbanlının anası Səkinə Qurbanlı aksiyanı dayandırmalarının səbəblərindən danışıb: “Biz aksiyanın sona qədər davam etdirməkdə israrlı idik. Sadəcə, övladlarımızın xahişlərini və onların məhkəmələrində iştirak etmək, yanlarında olmaq istəyimizi nəzərə alaraq, bu gün aksiyanı dayandırmağı qərara aldıq. Biz övladlarımız üçün canımızdan keçməyə hazırıq. Aksiyanı dayandırmağımız o anlama gəlməsin ki, biz mübarizəni dayandırdıq. Məhkəmənin hökmünü gözləyirik. Ondan sonra yenidən aclıq aksiyasına başlayacağıq. Hazırda 7 gündür ki, övladlarımız aclıq aksiyası keçirirlər. Onlardan ötrü çox narahatıq”.
Məhbus anası sonda onların hər zaman yanında olan media nümayəndələrinə öz təşəkkürünü bildirdi: “Bu 4 gün ərzində bizimlə maraqlanan, ziyarətimizə gələn, aksiyamız zamanı həmişə yanımızda olan media nümayəndələrinə, xüsusilə də Müsavat Partiyası rəhbərliyinə öz təşəkkürümüzü bildiririk”.
Valideynlər günün sonuna qədər aksiyanı davam etdirəcəklərini söylədilər.
Xatırladaq ki, aclıq aksiyasının keçirilməsinə səbəb 8 NİDA-çı gəncə prokurorun üst-üstə 64 il iş istəməsi olmuşdu.
Əvvəlcə aprelin 17-dən etibarən aksiyaya həbsdəki gənclər başlamışdı. Onların valideynləri isə öz övladlarına dəstək və NİDA-çı gənclərin həbsinə etiraz əlaməti olaraq, aclıq aksiyaslna qoşulmuşdular.
.jpg)
