AZ
RU
.jpg)
Turizm Agentliyi Xınalıqda bir evin təmir, bərpasına nə qədər vəsait xərcləyəcək?-DE-FAKTO
Yenixeber.org: Azərbaycan Respublikasının Dövlət Turizm Agentliyi Azərbaycan Respublikası Prezidentinin 20 aprel 2018-ci il tarixli “Mədəniyyət və Turizm sahəsində dövlət idarəçiliyinin təkmilləşdirilməsi ilə bağlı bəzi tədbirlər haqqında” Sərəncamına əsasən Azərbaycan Respublikası Mədəniyyət və Turizm Nazirliyinin əsasında yaradılıb.
Azərbaycan Respublikası Prezidentinin 2018-ci il 21 sentyabr tarixli Fərmanı ilə təsdiq edilmiş Azərbaycan Respublikasının Dövlət Turizm Agentliyi haqqında Əsasnaməyə uyğun olaraq Azərbaycan Respublikasının Dövlət Turizm Agentliyi turizm sahəsində, habelə tabeliyindəki dövlət qoruqlarının ərazilərində yerləşən tarix və mədəniyyət abidələrinin qorunması sahəsində dövlət siyasətini və tənzimləməsini həyata keçirən mərkəzi icra hakimiyyəti orqanı hesab edilir.
Qeyd edək ki, vaxtı ilə hər iki quruma sabiq Mədəniyyət naziri Əbülfəs Qarayev rəhbərlik edib. Ölkə başçısının məlum sərəncamından sonra Fuad Nağıyev Dövlət Turizm Agentliyinin sədri təyin edilib. Buna qədər Əbülfəs Qarayev Mədəniyyət Nazirliyini idarə etdiyi kimi, çox güman ki, elə turizm sektoruna da həmin qaydada rəhbərlik edib. Onun rəhbərliyi haqqında zənnimizcə şərhə ehtiyac yoxdur və son günlər ölkə mətbuatının gündəmini zəbt etmiş sabiq mədəniyyət işçilərinin məhkəmə proseslərində açıqlananlar özlüyündə çox məsələlərdən xəbər verir. Yəni həmin qaranlıq məsələlərin bir vaxtlar turizm sektorunda da baş verdiyi istisna edilmir.
Hazırda Dövlət Turizm Agentliyi daha çox ölkəyə xarici turistlərin cəlb olunması üzərində layihələr həyata keçirməklə yanaşı, tabeliyində olan tarixi-memarlıq qoruqlarında təmir-bərpa işləri də aparır. Qurum bu məqsədlə bir neçə tender proseduru həyata keçirib ki, onlardan biri diqqətimizi çəkdi.
Dövlət Turizm Agentliyinin Quba rayonunda yerləşən “Xınalıq” Dövlət Tarix-Memarlıq və Etnoqrafiya Qoruğunda qəzalı evlərin təmiri və bərpası (16 ev) işləri üzrə keçirmiş olduğu tenderdə 1 183 023.88 manat məbləğində satınalma müqaviləsi 22.07.2021-ci il tarixdə “STAR CONSTRUKTİON-12” Qapalı Səhmdar Cəmiyyəti ilə bağlanmışdır.
Tender elanından da göründüyü kimi, Dövlət Turizm Agentliyi Quba rayonunun qədim Xınalıq kəndində qəzalı evlərin təmir və bərpasını həyata keçirməyi planlaşdırır. Elandan da görsəndiyi kimi cəmi 16 evdə. Bunun üçün də Ağentlik bir milyon manatdan çox vəsait xərcləməyi planlaşdırır. Lakin bu nə dərəcədə real bir satınalmadır?
Təxmini hesablamalarımıza görə Xınalıq kəndində hər bir evin təmir-bərpası Dövlət Turizm Agentliyinə orta hesabla 73 938 manata başa gələcək. İnandırıcıdırmı sizcə? Biz kəndin relyefini, mal-materialların daşınmalarını və işçi qüvvəsini də nəzərə alırıq. Bununla belə ayrlan vəsait həddindən çox görsənmirmi? Qəzalı evin təmir bərpasına təxminən 74 min manat vəsait ayırmaqdansa elə həmin məbləğə yeni evlər tikərək kənddə qədimliklə müasirliyin vəhdətini yaratsaydılar daha yaxşı olmazdımı?
Bəli, biz kəndin qədimliyini başa düşürük. Bura sadəcə bir kənd olmaqla bərabər həm də Dövlət Tarix-Memarlıq və Etnoqrafiya Qoruğudur. Amma hesab etmirik ki, bu evlərin təmiri-bərpasında hansısa xüsusi arxitektura, memarlıq növlərindən, naxış və ornamentlərdən istifadə olunacaq. Sadəcə kəndin qədimliyi qorunmaqla qəzalı evlərdə təmir-bərpa işləri aparılacaq.
Xatırladaq ki, Kommersiya qurumunun hüquqi şəxslərin dövlət reyestrinə daxil edilmiş məlumatlarında “STAR CONSTRUKTİON-12” Qapalı Səhmdar Cəmiyyətinin 04.03.2016-cı il tarixdə İqtisadiyyat Nazirliyi yanında Dövlət Vergi Xidmətinin Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 2050 manat olan MMC-nin hüquqi ünvanının BAKI ŞƏHƏRİ BİNƏQƏDİ RAYONU, BİNƏQƏDİ ŞOSSESİ , ev 53, qanuni təmsilçisi kimi isə Bayramov Mirsahib Atamalı oğlu qeyd olunub.
Qeyd edək bu Səhmdar Cəmiyyətin adı bir çox şübhəli tenderlərdə keçir və bu barədə elektron kütləvi informasıya vasitələrində kifayət qədər məlumatlara rast gəlmək mümükündür. Dövlət Turizm Ağentliyinin artıq bu siyahıya düşməsi respublikanın turizm sektorunda da gizli oyunların baş verdiyini düşünməyə əsas yaradacaq. Ümid edirik ki, Agentliyin Maliyyə və Texniki Təchizat şöbəsinin müdiri Kamil Zalıyev və Satınalma və Texniki Təchizat sektorunun müdiri Mehman Bayramov bu şübhəli tenderə aydınlıq gətirəcəklər. (aktualinfo.org)
