AZ
RU
İranda qondarma "erməni soyqırımı"nın 105-ci "ildönümü" qeyd edilib -FOTOLAR
Yenixeber.org: İran mətbuatı xəbər verir ki, tədbirdə erməni xəlifəliyin baş yepiskopu Sepuh Sarkisyanla yanaşı, Ermənistanın İrandakı səfiri və ölkə rəsmiləri də iştirak ediblər.
Ən maraqlısı isə odur ki, İranın rəsmi xəbər agentlikləri də bu anım mərasimindən çəkilən fotoları böyük “comərdliklə” paylaşıblar. Halbuki ermənilərin bu yalan "soyqırım" iddiaları iki müsəlman dövlətin – Türkiyə və Azərbaycanın milli maraqlarına qarşı yönəlib. İran isə rəsmi adından da göründüyü kimi bir islam dövlətidir və erməni yalanının təmtəraqlı nümayişi Ramazanın ilk gününə təsadüf edirdi.
Üstəlik, soyqırım kimi qeyd edilən həmin hadisə Osmanlı dövlətinin Rusiya və bəzi Avropa dövlətləri tərəfindən qızışdırılaraq yerli müsəlman xalqa qarşı apardıqları qətliamın qarşısını almaq məqsədilə həyata keçirdiyi məcburi köç tədbiri idi. Belə ki, 1915-ci ildə Osmanlı hakimiyyəti öz ərazisində yaşayan erməniləri Rusiyanın təsir dairəsindən uzaqlaşdırmaq üçün ölkənin şimalından cənubuna köçürmüşdü. Hansı ki, o zaman Osmanlı dövləti Rusiya ilə vuruşur, ermənilər isə Moskva tərəfindən vətəndaşları olduqları dövlətə qarşı qiyama təhrik edilirdilər.
Osmanlının ağır döyüşlər apardığı həmin vaxtlarda ermənilər kimi ölkənin digər milli və etnilk qrupları arasından da soyuqdan və aclıqdan xeyli ölənlər olmuşdu. Ermənilərin başlatdığı bu vətəndaş müharibəsində yerli müsəlman xalqlar qətlə yetirilir, namusuna təcavüz edilir, torpaqları ələ keçirilirdi. Bütün bunların müqabilində isə Osmanlı hökuməti öz dövlətinə asi kəsilmiş insanları başqa yerə köçürməklə kifayətlənirdi. Misli görünməmiş böyük xəyanət qarşısında sərgilənən bu mövqe nəinki soyqırım deyildi, əksinə heç bir millətin göstərə bilməyəcəyi humanist addım təsiri bağışlayırdı.
Təkcə onu xatırlatmaq kifayətdir ki, Qarsı erməni-rus işğalından azad etmək üçün keçirilən Sarıqamış əməliyyatında 100 minə yaxın Osmanlı əsgəri soyuqdan ölmüşdü. Bütün bunlar hesaba qatılmadan 1 milyona yaxın erməninin təhlükəsizlik məqsədilə başqa yerə köçürülməsini soyqırım adlandırmaq məntiqə sığmadığı kimi, islami vəhdət anlayışı ilə də üst-üstə düşmür.
Nə yazıq ki, bu cür həssas məsələlərdə İran hələ də xristian təəssübkeşliyi nəticəsində əzilən müsəlman xalqların yanında dayanmaqdansa “böyük şeytan” adlandırdığı qüvvələrlə həmrəylik nümayiş etdirir.
Onu da qeyd etmək yerinə düşər ki, İranda hələ də koronavirus karantini tam aradan qaldırmayıb. Buna rəğmən, rəsmi Tehran ermənilərin kütləvi tədbir keçirməsinə nəinki mane olmur, əksinə şərait yaradır. Və həmin tədbirdə iştirak edənlər üzlərinə maska taxmağa belə gərək görmürlər. Başqa sözlə desək, öz himayədarlarının qərarına belə, sayqı göstərmirlər.
Aşağıda təqdim etdiyimiz fotolar da bunu təsdiqləyir və İranın rəsmi media qurumları tərəfindən çəkilib.
