Martın 18-də ABŞ Konqresi hökumətin koronavirusa görə zərər çəkən kiçik və orta sahibkarlıq subyektlərinə, həmçinin fərdi şəxslərə dəyən zərərin təsirlərini azaltmaq planına dəstək verib. İlkin mərhələdə 1 trilyon dollar qiymətləndirilən yardım paketində hansı tədbirlər nəzərdə tutulur?

Yenixeber.org: ABŞ-da yaşayan iqtisadçı-alim Fariz Hüseynlinin dediyinə görə, ilkin olaraq kiçik və orta şirkətlərə maliyyə yardımı etmək üçün 1 milyard dollarlıq subsidiya krediti ayrılır: “Bu, kiçik şirkətlərə, kənd təsərrüfatı kooperativlərinə, akvakultur istehsalçılarına və nonprofitlərə maliyyə zərərlərini qarşılamaq üçün verilən kreditdir. Kiçik Biznes Administrasiyasına əlavə imkan verilir ki, 7 milyard dollara qədər kredit ayıra bilsin.
Kiçik şirkətlərə işçiləri üçün ödəyəcəkləri ödənişli tibbi icazə və səhiyyə xidmətləri üçün çəkilən xərclərin əvəzini çıxacaq vergi krediti (geri ödəmə) verilir. Buna əsasən şirkətlər iş vaxtı koronavirus xəstəliyinə tutulmuş işçilərinin bəzi xərclərini ödəyərsə bu xərclər dövlət tərəfindən geri verilir. Hazırda bu vəsaitləri ödəyə bilməyən şirkətlər üçün Xəzinədən avanslar veriləcək. Tibbi xidmətlərin xərcini qarşılamaq üçün aztəminatlı ailələrə ayrılan səhiyyə xidməti xərclərinin federal hökumətin payına düşən hissəsi artırılıb”.

 
Bundan əlavə, ayrı-ayrı ştatlara təxminən 1 milyard dollar ayrılır ki, artan işsizlik müavinətini ödəyə bilsinlər: “1.2 milyard dollar ayrılıb ki, koronavirus testi üçün xərcləri ödənsin. 500 milyon dollar ayrılır ki, xüsusi riskli qruplara (hamilə qadınlar və azyaşlı uşağı olan analara qida yardım edilsin) və uşaqlara pulsuz yemək verilsin. Aztəminatlı yaşlılar üçün də ayrıca 25 milyon yemək paketinin hazırlanması üçün vəsait ayrılıb. Yerli qıda banklarına (food bank – kasıblar üçün yemək verən QHT-lər) 400 milyon dollarlıq yardım paketi açıqlanıb. Məktəblərə şagirdlərin gəlib pulsuz və ya ucuz yemək alma imkanı üçün ayrıca fond ayrılıb. Məktəbi və bağçası bağlandığına görə evdə qalmalı olan valideynlər üçün müavinət ayrılıb. Göründüyü kimi, böhranın təsirinin böyük olacağını düşünərək dərhal addımlar atıblar. Çatışmayan bir cəhət var ki, bu paketlərdəki tələblərin böyük şirkətlərə böyük hissəsi aid deyil. Bu barədə çox müzakirə getdi, bir tərəfdən deyildi ki, bu şirkətlərin 90 faizi özləri artıq verirlər bu yardımları öz hesablarına və dövlətin vəsaitini verməyə ehtiyac yoxdur. Digər tərəfdən, böyük şirkətləri məcbur edəcək addımlar atmaq lazımdır deyənlər var idi. Amma görünür, dərhal paketi qəbul etmək istəyirlər deyə bu müzakirələri kənara qoydular”.

Hazırda Konqresdə böyük şirkətlərə yardımı nəzərdə tutan üçüncü paket üzərində müzakirələr gedir: “Əsas mübahisələr bu paket üzərində olacaq. Burada böhrandan təsir alan böyük şirkətlərə yardım nəzərdə tutulur – vergi endirimi, xilasetmə yardımı və s. Bura hava yollarından tutmuş istehsalçı şirkətlər, turizm şirkətləri və s. daxildir. Eyni zamanda FED korporativ borcları almağı nəzərdən tutur. Son zamanlarda külli miqdarda borc alan, öz səhmlərini geri alan şirkətlərə yardım ediləcəksə, bu şirkətlərə moral hazard siqnalı göndərəcək deyə bu sahədə ucdan tutma hamıya yardım etmək olmaz. Hər halda, demokratlarla respublikaçıların əsas müzakirəsi bu barədə gedəcək”.

Bundan əlavə, ABŞ-da korporativ borcların alışı ilə bərabər pay-investisiya fondlarına dəstək üçün böyük bir prorqam da işlənir. Əhali və biznes panik stiuasiyada öz pullarını çəkəsi olduqda əldəki aktivlərini diskontla satmağa məcbur qalmasınlar deyə belə yardım paketi hazırlanıb.

DÜNYA (müsavat)