Azərbaycan Respublikasının Energetika Nazirliyi yanında Bərpa Olunan Enerji Mənbələri Dövlət Agentliyi 12.12.2022 -ci il tarixdə ofis icarəsi ilə bağlı iki müqavilə bağlayıb

Yenixeber.org: Azərbaycan Respublikasının Energetika Nazirliyi yanında Bərpa Olunan Enerji Mənbələri Dövlət Agentliyi bu ayın 12 –də ofis icarəsi ilə bağlı "Azəridmanservis”" MMC və "İnzibati binaların istismarı mərkəzi" MMC ilə müqavilələr bağlayıb. Bu müqavilələr üzrə Bərpa Olunan Enerji Mənbələri Dövlət Agentliyi "Azəridmanservis”" MMC-nə 56753 manat, "İnzibati binaların istismarı mərkəzi" MMC –nə isə 23987 manat ödəyəcək.

Olsun, ilk baxışdan qeyri-adi bir nəsnə görünməsə də, Yenixeber.org-a daxil olan məlumatlarda bu əməkdaşlıqların ilginc tərəflərindən bəhs olunur... Məlumata görə Bərpa Olunan Enerji Mənbələri Dövlət Agentliyi hər iki müqaviləni müvafiq satınalama müsabiqələri keçirmədən, birbaşa -bir mənbədən istifadə etməklə bağlayıb(?)    

Bu əməkdaşlıq barədə məlumatlar dövlət satınalma portalı vasitəsilə ictimaiyyətə açıqlanıb. Amma,... Bərpa Olunan Enerji Mənbələri Dövlət Agentliyi bu tələbat və satınalmalarda bir mənbədən istifadə edilməsi metodunun səbəbləri barədə məlumat vermir(?)

“Dövlət Satınalmaları Haqqında” qanuna uyğun olaraq müvafiq satınalama sorğusu baş tutmadan, tələbat və satınalmada bir mənbədən istifadə edilməsi metodunun səbəbləri, eləcə də, görüləcək xidmətlər barədə məlumat verilmədən...(?) Bərpa Olunan Enerji Mənbələri Dövlət Agentliyi tərəflərlə toplam 80740 manatlıq müqavilə bağlayıb!

Bərpa Olunan Enerji Mənbələri Dövlət Agentliyi həm də bu əməkdaşlıqların təfərrüatını açıqlamır(?) Maraqlıdır ki, dövlət satınalma portalında da, müqavilənin predmeti, gerçəkləşdiriləcək əməkdaşlıqlarla bağlı heç bir məlumat yoxdur(?)  Baxmayaraq ki, dövlət qurumu olaraq şəffaflığı təmin etmək, ölkə ictiamiyyətinə dəqiq, dolğun məlumat vermək Bərpa Olunan Enerji Mənbələri Dövlət Agentliyinin də, vəzifə borclarından biridir...

 Xüsusi ilə ölkəmizin indiki məlum, maliyyə-iqtisadi durumunda bu məsələ dövlət yetkililərinin məsuliyyətini birə beş artırmış olmalıdır. Həm də, nə az, nə çox söhbət dövlətin 80740 manatıdan gedir...

           ***

Azərbaycan Respublikası Prezidentinin 29 yanvar 2002-ci il tarixli, 668 saylı Fərmanı ilə qüvvəyə minmiş “Dövlət satınalmaları haqqında” Azərbaycan Respublikası Qanuna əsasən 5000 manatadək olan satınalmalar müqavilə, 5000-50000 manat arası satınalmalar kotirovka sorğusu metodu, qiyməti 50000 manatdan çox olan işlərin, malların və xidmətlərin satınalınması istisna yoxdursa, açıq tender üsulu ilə həyata keçirilir...

Elə isə sual olunur: Bərpa Olunan Enerji Mənbələri Dövlət Agentliyi nədən bu qanunu “unudub” və müvafiq satınalam sorğusu baş tutmadan hansısa şirkətlərlə birbaşa müqavilə bağlayıb? Hansı işlərin görüləcəyi haqqında da, heç bir məlumat açıqlamadan(?) Niyə nəzərdə tutulan əməkdaşlığın detalları açıqlanmır? Burada hansı bir istisna mümkündür ki? Və s.

Amma suallar bununla bitmir...Biz Yenixeber.org olaraq bu və digər suallara aydınlıq gətirmək məqsədi ilə tərəflərlə əlaqə yaratmağa çalışdıq.

Bu ayın 12 -də Bərpa Olunan Enerji Mənbələri Dövlət Agentliyinin direktoru cənab Cavid Abdullayevə elektron sorğu ünvanladıq. 4 gün sonra qarşı tərəfdən cavab gəldi: Nəzərinizə çatdırırıq ki, Bərpa Olunan Enerji Mənbələri Dövlət Agentliyinin "AZƏRİDMANSERVİS" MMC ilə aktiv müqaviləsi yoxdur.

Buna nə dərəcədə cavab demək mümkündürsə,... Əvvəla, təkrar qeyd edək ki, Bərpa Olunan Enerji Mənbələri Dövlət Agentliyinin ofis icarəsi ilə bağlı "Azəridmanservis”" MMC ilə 12.12.2022 –ci il tarixdə 56753 manatlıq müqavilə bağlaması haqqında Dövlət satınalmalarının vahid internet portalında da bir mənbədən istifadə edilməsi ilə bağlı məlumat yerləşdirilib. Digər tərəfdən, bizim cavab almaq istədiyimiz suallar bugünədək niyə cavabsız qalır?  

Qurumun Cavid adlı rəsmisi bizimlə telefonla danışsa da, suallarımızdan yayındı... Sonda online deyil, rəsmi sorğu ünvanlamağımızı təklif etdi. Müasir jurnalistikanın operativliyini, online sorğunun da məlum qayda və prinsiplərə uyğun olduğunu xatırlatsaq da nəticə olmadı... Önəmli olanı sualların hansı formada ünvanlanması deyil, cavab vermək istəyi, toplanmasında bizim ödənişlərimizin də yer aldığı dövlətin pulunun necə xərclənməsinə aydınlıq gətirməkdir!

                 ***

Paralellik aparmaq niyyətində olmasaq da, xatırladaq ki, bir il əvvəl həbsə atılan Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) sabiq rəhbəri Vüqar Səfərliyə qarşı korrupsiya ittihamlarında biri də ofis icarəsi ilə bağlı idi... Məlum olmuşdur ki, Vüqar Səfərli digər şəxslərlə qabaqcadan əlbir olaraq qurumun fəaliyyətinin təşkili üçün inzibati bina üzrə münasib yerin ayrılması və ya qeyri-yaşayış sahəsinin aşağı qiymətlərlə icarəyə verilməsi üçün Nazirlər Kabinetinin qərarları ilə müəyyən edilən qanuni prosedurlara qəsdən əməl etmədən, həmin Fondun maliyyələşməsinin həyata keçirildiyi dövlət büdcəsindən ayrılmış vəsait üzrə icarə xərclərinin özünün əvvəllər sədri olduğu, sonradan isə özünə yaxın şəxslərin fəaliyyətlərinə faktiki nəzarəti həyata keçirməkdə davam etdiyi şirkətlərə, habelə yaxın münasibətdə olduğu digər şəxslərə gəlir qismində verilməsinə nail olmaqdan ötrü həmin şəxslərin xüsusi mülkiyyətində olan Bakı şəhəri, Yasamal rayonu, Mətbuat prospekti, 23L ünvanında yerləşən müəssisə binasının 3-cü mərtəbəsinin Fondun inzibati istifadəsinə verilməsi məqsədilə maddi baxımdan Fond üçün daha ağır şərtlərlə icarəyə götürülməsinə dair müqavilələr bağlayıb, 2011-2019-cu illər ərzində cəmi 812 min manat məbləğində pul vəsaitini icarə haqqı adı ilə köçürməklə dövlət büdcəsinə külli miqdarda ziyan vurub.     

            ***

Digər tərəflər - "Azəridmanservis”" MMC və "İnzibati binaların istismarı mərkəzi" MMC ilə isə heç bir əlaqə yaratmaq mümkün olmadı. Heç də az olmayan dövlət vəsaitinə iddialı bu qurumlarla bağlı internet üzərindən əldə etdiyimiz vasitələrlə əlaqə yarada bilmədik...

           ***

Bu gün, bu saatlarda (21.12.2022-ci il. saat 12: 25-də) Bərpa Olunan Enerji Mənbələri Dövlət Agentliyi redaksiyamızın elektron poçtuna cavab məktubu göndərib. Cavabla olduğu kimi siz də tanış olun:

 Qeyd edilən məsələ ilə əlaqədar olaraq bildiririk ki, bütün satınalma prosedurları “Dövlət satınalmaları haqqında” Azərbaycan Respublikasının Qanununa uyğun olaraq həyata keçirilir və müəssisəyə ayrılmış xərc maddəsində olan vəsaitə uyğun olaraq müvafiq satınalma üsulu seçilir. Keçirilən satınalma prosesinin qanunauyğunluğuna Azərbaycan Respublikasının İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən nəzarət olunur və keçirilən prosesin sonunda bağlanan müqavilələr və protokollar həmin Xidmətə təqdim edilir. Bununla yanaşı bildiririk ki, "AZƏRİDMANSERVİS" MMC ilə hal-hazırda aktiv müqaviləmiz yoxdur. Dövlət Elektron Satınalmaları Portalında göstərilənlər isə əvvəllər imzalanmış və ilin əvvəlində yenilənən müqavilələri əks etdirir. "İnzibati binaların istismarı mərkəzi" MMC ilə isə Hökumət Evindəki sahələrlə bağlı standart müqavilə (Hökumət Evində yerləşən bütün qurumlarla bağlanmış) illər öncə bağlanmış və qüvvədədir. Göstərilən xüsusatlar məsələ ilə digər bütün məqamları da özündə ehtiva edir.

Redaksiyadan: Bərpa Olunan Enerji Mənbələri Dövlət Agentliyinin bu cavabının yazıda yer alan faktorlara nə dərəcədə aidiyyatı olduğunu sayqılı oxucularımızın öhdəsinə buraxırıq... 

 (Mövzunun davamı olacaq.)

Yazıda adları yer alan tərəflərin cavab haqqını tanıyırıq.