AZ
RU
Sabiq müstəntiq dələduzluqla bağlı sorğu-sual olundu
Baş Prokurorluq: “Rövşən Əhmədov tutduğu vəzifədən uzaqlaşdırılıb”
Göygöl Rayon Prokurorlugunun sabiq müstəntiqi Rövşən Əhmədov dələduzluq faktına görə başlanmış cinayət işi üzrə dindirilib.
Xeberinfo.com: “Yeni Müsavat”a daxil olan məlumata görə, R.Əhmədovdan bir neçə şikayətçi var. O, tutduğu vəzifədən ayrı-ayrı vətəndaşların ondan hüquq-mühafizə orqanlarına şikayətindən sonra uzaqlaşıdırlıb.
Belə ki, Baş Prokurorluğa şikayət edən vətəndaşlar bildiriblər ki, R.Əhmədov onlardan külli miqdarda pul alıb. Bundan sonra müstəntiq baş prokuror Zakir Qaralovun əmri ilə sərəncama göndərilib. Fakt üzrə Cinayət Məcəlləsinin 178.3.2-ci (dələduzluq) maddəsi ilə cinayət işi başlanıb. Sabiq müstəntiq moderator.az-a bu barədə danışmaqdan imtina edib.
“Yeni Müsavat”ın əməkdaşı məsələ ilə bağlı Baş Prokurorluğa sorğu ilə müraciət edib. “Rövşən Əhmədov tutduğu vəzifədən uzaqlaşdırılıb. Dələduzluq faktına görə cinayət işi başlayıb. Rövşən Əhmədov şahid qismində dindirilib” - deyə sorğumuzu cavab olaraq bildilib. Qeyd olunub ki, Rövşən Əhmədova hər hansı ittiham irəli sürülməyib. Hazırda istintaq davam etdirilir.
Xatırladaq ki, Rövşən Əhmədovun adı bir il əvvəl Göygöldə qətlə yetirilən “qara kəmər” ustası Kamal Rüstəmovun qanını batırmaqda hallanıb. Belə ki, müstəntiqin icraatında olan cinayət işinin qeyri-obyektiv aparılması nəticəsində idmançı gənci qətlə yetirən cinayətkar dəstənin iştirakçıları məsuliyyətdən kənarda qalıb.
.jpg)
