Azərbaycanda "Valyuta tənzimi haqqında" qanunda dəyişikliklər edilməsi barədə qanun layihəsi hazırlanıb.

Yenixeber.org:  Təklif edilən dəyişikliklər nəticəsində valyuta mübadiləsi əməliyyatlarının aparılması qaydaları, o cümlədən təşkilati, texniki təchizat, təhlükəsizliyə dair tələblər, uçotun, hesabatın, sənədləşmənin vahid formaları, onların müddətləri, habelə həmin fəaliyyəti göstərəcək obyektlərin yerləşəcəyi ərazilər maliyyə bazarlarına nəzarət orqanı tərəfindən müvafiq icra hakimiyyəti orqanı ilə razılaşdırmaqla müəyyən ediləcək.

Bu haqda Modern.az-a danışan İqtisadçı Natiq Cəfərli deyib ki, "Valyuta tənzimi haqqında" qanunda dəyişikliklər edilməsi ilə Azərbaycanda fiziki şəxslərə valyutadəyişmə məntəqəsi yaratmaq səlahiyyəti verilir.

N.Cəfərli bildirib ki, dəqiq müdəalar qanun qəbul olunduqdan sonra məlum olacaq:

“ Təklif edilən dəyişiklik valyutadəyişmə məntəqələrinin yenidən açılması anlamına gəlir. Valyutadəyişmə məntəqəsinin fəaliyyət göstərməsi üçün xüsusi tələblər var: seyf qapı, seyflər, siqnalizasiya və s. Fziki şəxslər 500 manat lisenziya haqqı ödəməklə valyutadəyişmə məntəqəsi işlədə biləcək. Yəni fiziki şəxslər banka bağlı olmadan birbaşa fəaliyyət göstərə biləcəklər”.

Ekspertin sözlərinə görə, qanuna edilən dəyişiklikdə məqsəd qapadılmış valyutadəyişmə məntəqələrinin yenidən fəaliyyətinə hesablanıb:

“Əslində doğru olan da budur. Valyutadəyişmə məntəqələrinin bağlanması heç bir iqtisadi effekt vermədi, əksinə bazarda panikanı artırdı, “qara bazar”ın yaranmasına təkan verdi. Eyni zamanda vətəndaşlara, turistlərə axşam saat 6-dan sonra valyuta dəyişməkdə çətinlik yaratdı. Çox güman ki, əvvəlki valyutadəyişmə məntəqələrinin bir çoxu açılacaq. Çünki onlar tələb edilən kriteriyalara uyğundur, seyflə, seyf qapı ilə, gülləkeçirməz şüşə ilə təmin olunmuşdu.

Mənim fikrimcə, valyutadəyişmə məntəqələrinin yenidən açılması “qara bazar”ı tamamilə aradan qaldıracaq. Çünki “qara bazar”ın yaranmasının yeganə səbəbi bankların iş saatları ilə vətəndaşların tələblərini ödəməməsindən irəli gəldi. Azərbaycanda 1990-cı illərdə də “qara bazar” var idi. Valyutadəyişmə məntəqələrinin yaranması ilə “qara bazar” sıradan çıxdı. Əminliklə deyə bilərik ki, bu dəfə də valyutadəyişmə məntəqələrinin yenidən fəaliyyətə başlaması”qara bazar”ı sıradan çıxaracaq”.