Yenixeber.org: Cümə günü Brüsseldə keçirilən iclasda Avropa İttifaqı Xarici İşlər nazirlikləri rəhbərləri beşinci cərimə tədbirləri paketini təsdiq ediblər. Bununla 2022-ci ilin avqustundan Rusiyadan kömür və digər bərk enerji daşıyıcılarının idxalına qadağa qoyulub.

Bundan əlavə, Rusiya Federasiyasına yüksək texnologiyalı məhsulların göndərilməsi qadağan edilib.

Həmçinin, VTB də daxil olmaqla, Rusiyanın dörd bankının Avropa İttifaqı ərazisində köçürmələrinə tam qadağa qoyulub.

Rusiya gəmilərinə və Rusiya bayrağı altında üzən gəmilərə Avropa İttifaqının limanlarına daxil olmaq qadağan edilib.

Bundan əlavə, sanksiyalar Rusiya ilə ticarətin gələcək məhdudlaşdırılmasını nəzərdə tutur. Belə ki, Rusiyadan ağac, sement və dəniz məhsullarının idxalı qadağan edilib. Bu məhdudiyyətlər 15-20 milyard avro həcmində dəyərləndirilir.

Avropa Komissiyasının rəhbəri Ursula fon der Lyayen bu paketi aprelin 5-də, Buça şəhərində rusiyalı hərbçilərin dinc ukraynalıları kütləvi qətl etdiyinə dair sübutlar ortaya çıxdıqdan sonra  sonra təklif edib.