-1-

    ONU   TANIYIRSINIZ

    Başlanğıc.. 

                            Yenə danışırsan....

                            sevgidən,

                            həyatdan,

                            dünyadan....

                            danışırsan  həvəslə,

                            dil-dodağın əsə-əsə,

                            birnəfəsə-

                                            danışırsan

                            ...yenə də aldadırsan...

                            bu da aldanış yarğanı...

                            sənin inamın  varmı ?

                            -kiminsə  sevgisinə ?!

                            ...axtar tap.

                            elə bu an, bu  saat,

                            nə qədər yaltaq varsa-

                            yığ  başına....  və aldat!!

                            …nahaq yorursan özünü.

                            heç nə alınmayacaq !

         SON..         belə olur həmişə…

                            özünü aldadanın

                            kimsəni  aldatdığına 

                            heç kim inanmayacaq!

              -2-

   ÇƏKƏN BİLƏR

Başlanğıc..   Kimi keşik çəkir,

                     kimi də cəza...

                     kiminin gözü yol çəkir,

                     kimini qəza...

                     Qəribədi həyat  da...

                     Eh...

                     nələr var həyatda,

                     nələr var çəkiləsi...

                     dərd...qəm …

                           əzab…əziyyət…

                     dişiylə,

                     saçıyla  maşın çəkən də var,

                     gəmi, qatar çəkən də...

SON..      Kim nə çəkir, qoy çəksin;

                iş heç bunda da deyil

                amma öz aramızdı,

                təəssüb  çəkmək

                hər kəsin işi deyil....

             -3-

        PRELÜD

Başlanğıc..    Yayın sonu...

                      ağaclar soyunub donunu...

                      hər yan sarı üzüntü...

                      Qəfil telefon zəngi...

                      dəstəyin o başında

                      tanış bir səs:

                      “Gəl...”-deyir,

                     “gəl, unutduğun gəncliyi apar...

                      gəl öyrən sevməyi,

                      baxmadan görməyi,

                      qaranlıqda günəşi

           -necə gözləməyi öyrən,

                      Sevməyi öyrən”-deyir...

SON..            Xəbərin varmı ?-

                      sarı çiçəklərin sarısından

                      ayırmaq olarmı

                      -ac arını???

          -4-

         ÖYÜD

                              Oğlum Əzizə

Sevmək-bulud kimi dolmaqdı,

yağış olub yağmaqdı.

can verib, 

                 can almaqdı,

ruzi,bərəkətdi sevmək...

...bir bulud kölgəsində

təpədən dırnağadək islanmaqdı.

islana-islana yuyunmaqdı...

               yuyuna-yuyuna  anlamaqdı yağışı...

 Sevmək nədi? –soruşursan...?!

Baxçamızda saralan  o ağaca bir də bax !

qoru, o budaqdakı tənha quş yuvasını

amma oynama, oğul,

                         yuvayla oynamazlar !

bahar- yenə gələcək,

                               bahar geri dönəcək,

quşlar da qayıdacaq

                               öz isti yuvasına...

sevmək nə olduğunu anlayacaqsan onda-

uyma dəli dünyaya;

bax Günəşə, bax Aya

küləyi dinlə.

dənizin səsinə qulaq as !

küləkdən, dənizdən güc al !

özünə güvən,

                     özün ucal !

od ol,

          alov ol,

ocağın olsun.

ocaqla oynama,oğul !

“Ürəyin” olsun,

ürəyini açmağa

isti qucağın olsun

-qucaqla oynama, oğul !

Verdiyin söz,

                     kəsdiyin duz -çörək

düz olsun-

bıçaqla oynama, oğul !

Sevmək nədi ?- soruşursan?

sevmək yoldu, yolçuluqdu

məmləkətə yağan

                             ilk qar kimi tər –təmizdi,

ağappaqdı, ləkəsizdi – sevmək !

bir də ki,...

bir də ki

sənin

hardan gəlib,

                      hara getdiyini göstərən -ləpirdi,    

                                                                         izdi                                                                       

ruzi, bərəkətdi sevmək !...

                    -5-

               ETİRAF

                      Sevmək var ömür sürər,

                      …sevişmək var

                      hər bir anı – bir ömür....

Qoxusu bahar yağmuru...

çöhrəsi Ay şöləsi....

yanağı şeh düşmüş lalə --

                                      qadındı...

bir cüt yaşıl gözləri var

                                       yosun-yosun.

baxışları ovsun-ovsun--

                                     qadındı.

vücudu çiçək yatağı,

qızılı saçları yarpaq-yarpaq...

istəyimin gerçək olduğu yerdə

                                        görüşdük onunla...

üzünü gizlədi məndən.

salam verdim ürəyimdə...

 gözləriylə alınca

                                dedi:

“sevgiyə inanmaq azdı.

...ona heç sahib olmaq da  yetməz”...

bir başqa dünyaya kilidlənmişdim,

açarını axtarırdım...

bir damla su - mən

 “islanmaq istəyirəm  “ -

                                          deyən o qadın....

                    -6-

                Sən də...

 Sən də bir zamanlar şair idin...

-yağardın yağmurla,

əsərdin rüzgarla.

O zamanlar ki-

sərxoş könlün

dəli-divanə

dolaşardı ürəkləri –

oyuncağın – ürəklərdi,

oynayardın ürəklərlə

yerin - yurdun ürəklərdi...

Və bir gün

quşların çivil-çivil

ötdüyü bir gün.

çiçəklərin tənbəl-tənbəl

açdıqı o gün

qəlbini açdın bir qıza

sən də.

-Aşiq oldun.

... Dilin hökmünü itirdi,

sözün mülkünü .

Çapdı, taladı, aldı, apardı

fəda etdin- nəyin vardısa.

Könlünü verdiyin o qızın-

könlünü ala bilmədin.

Və sən də

öz eşqinin

öz sevginin

həbsindəki dustaq oldun.

...Sənsə bir zamanlar şair idin,

yağardın yağmurla, əsərdin rüzgarla...

              -7-

BAZAR   ERTƏSİ   ESKİZİ.

Bazar ertəsi günləri mənə

sıxılmış bir narı xatırladır;

elə bil

həftənin ağrısın-acısın

canından çıxarıb

                  sıxırsan bu günün üstünə.

bu günlər

yenicə doğulmuş körpətək ürkək,

               qayğıya,

                           köməyə möhtac

qocatək – kövrək oluram nədənsə...

 Bazar ertəsi günləri

“Əlim nə işə yatır”-ın?

“Ağlım nə isə kəsir”-in? fərqinə varmaqdır

                                              bəlkə də.

Və bu günü

                       yeni bir ömrün

                                       yep-yeni günütək hər dəfə

yenidən öyrənmək,

yenidən yaşamaq şansım var

                                          -əslində