Xeberinfo.com:  
Ay nadan, özünü niyə danırsan?
Özgə qapısında nə yalmanırsan?
Bəxtiyar VAHABZADƏ
Keçdi qərinələr,
keçdi əsrlər,
bu dünya neçə yol baş-ayaq oldu.
Bizim içimizdə nakəs- namərdlər
Bəs necə doğuldu?
Nə sayaq oldu?
...Çay coşur, 
sel gəlir,
ildırım çaxır...
Ölüm yuxusuna dalıb yatırıq. 
Ayılsaq, 
gedirik suyun üzündə, 
Özgəyə tələsik kəndir atırıq.
Bir xalqı məhv edər
bir kəlmə söz də
Ox geri qayıtmaz çıxsa yayından.
Qapının iti də süləngidirsə,
əl çəkməz qonşunun tula payından.
Artır çayır kimi,
kəsilmir kökü...
Namusu hərraca qoyub satan var.
Özü qucaqlayıb
sönük ocağı,
özgə ocağına odun atan var.
Ələkdən.
xəlbirdən keçirsən belə,
açılmaz içinin paxırı, pası.
Yeddi qat əyilsə yadın önündə,
o zaman bilinər
yeddi arxası!
Torpağı candərdi əkib becərsən,
Sübülü dən olmaz!
Sirri şumdadır!
Qadının bətni də torpaq kimidir,
Günah kişidədir--
haram tumdadır!
Üzdür süd gölündə
gecəbəgündüz,
Döndər sərvətini əlçatmaz dağa.
Sevdirə bilməzsən
yazıq Vətəni,
sevdirə bilməzsən
yalaq-yaltağa!
Keçdi qərinələr,
keçdi əsrlər,
Bu dünya neçə yol baş-ayaq oldu.
Bizim içimizdə nakəs-namərdlər
Bəs necə doğuldu?
Nə sayaq oldu?

ETİBAR ETİBARLI