Xəyalım yenə də düzənsiz olub,
"Aran gedir Turana", "Turan gəlir Arana".
Fikirlər bilmirəm, uçur hayana,
Səs oynar başımda vuran, vurana!...
*****
İnsanlar yamanca qaniçən olub,
Bir salam verdinsə tərs gəlir sözün.
Sümürüb nə varsa canbiçən olub,
Baxışı dəyişir, bərəlir gözün.
*****
Düşünüb, daşınıb heç anlamıram,
Bizlərmi dəyişdik  yoxsa ki, dövran?!...
Dövranı, zamanı heç danlamıram,
Yuyulub beyinlər, kirlənibdi qan...
*****
Başımın havası çənli, dumanlı,
Doğrusu, təmizcə düşünəmmirəm.
Ümidlər sıfırdı qara gümanlı,
Bir küncə çəkilib  büzüşəmmirəm...
*****
Uçuşan xəyalım, keçmişə qayıt,
Yaşamaq "o" gündü bu günə baxma.
Yatıbdır xatirəm, ayılt sən, ayılt,
Eynək tək kölgəmi gözümə taxma!...
*****
Qəlbimin niskili könül yaramdı,
Gömülüb köksümə yandırır məni
Həyatda "xöşbəxt"lik nədən haramdı?!...
Keçmişin acısı qandırır məni...
*****
Sanmadım bu dünya belə fırlana,
Bir insanoğlunu  belə azdıra.
Bu həyat ömrümü belə sındıra,
Ürəyim bu yükü harda basdıra?...
*****
Xəyalım, dön geri uzağa getmə!...
Aran qəlbindirsə  Turan  ürəyin.
Şeytandı qarşında  tuzağa getmə,
Haqq yolu sənindir, vuran əl sənin!...
*****
Yol azan duyğular bilməm nə yazar,
Kəlmələr dolaşıq, Allahdı kərim.
Qələmim itisə, sözüm "gor" qazar,
İnqilab, istəsək başlayar "HƏRBİM"...

Təranə Şəms