Məşhur müğənni Ariana Qrandenin sabiq sevgilisi, 26 yaşlı amerikalı reper, əsl ad və soyadı Malkolm Ceyms MakKormik olan Mak Miller 26 yaşında keçinib. Onun ölüm səbəbi narkotik maddəni ifrat miqdarda qəbul etməsidir.

Yenixeber.org: Reperin cəsədi ABŞ-ın Kaliforniya ştatının cənubunda, San-Fernando vadisindəki evində tapılıb.

Dostu Maka dəfələrlə zəng etsə də, cavab ala bilməyib. Belədə o, təcili yardıma zəng vurub.

Evə yollanmış polislər və təcili yardım heyəti Mak Millerin öldüyünü görüblər.

Mak Miller uzun müddətdən bəri narkotik maddələr qəbul edirdi. 2018-ci ilin mayında məhz narkotik maddələrdən asılılıq səbəbindən sevgilisi Ariana Qrande onunla münasibətləri kəsmişdi. Elə həmin ay Mak Miller narkotik maddə qəbul edərək maşın sürmüş, qəza törətmiş, hadisə yerindən qaçmışdı.

Mak Miller narkotiklərdən qurtulmağa çalışdığını söyləyirdi.

Mak Miller reper olmaqla yanaşı, bəstəkar, hip-hop ifaçısı və prodüser idi.

O, 2011-ci ildə "Donald Tramp" kompozisiyasının videoklipinə YouTube-da 102 milyon dəfədən çox baxılandan sonra məşhurlaşmışdı.

Reperin son mahnısı videoklipi iyulun 12-də YouTube-a yüklənmiş "Self Care"dir.