Yenixeber.org: Hazırda dünyada 4 milyon 525 min 497 yoluxma və 307 min 395 ölüm faktı qeydə alınıb. Koronavirusun dünyanı cənginə alması insanlarda fərqli fikirlər formalaşdırmağa başlayıb. Belə ki, artıq əksəriyyət bu virusa ən çox can alan xəstəlik kimi baxır. 

Lakin tarixə nəzər saldıqda, ətraflı araşdırma apardıqda görürük ki, digər xəstəliklər səbəbilə ölənlərin sayı da heç də az deyil. Hətta gündəlik ölüm səbəblərinə nəzər saldıqda bəzi xəstəliklərin COVİD-19-dan daha insan ölümünə səbəb olur. 2017-ci ildə dərc edilmiş son geniş araşdırmaya əsasən, dünyada gündəlik təqribən 150.000 insan həyatını itirir. Ürək-damar xəstəlikləri dünya miqyasında ən böyük ölüm səbəbidir. Lakin o, nə ölüm haqqında təsəvvürlərimizdə, nə də mediada əks olunmur. HİV / AİDS-dən ölənlərin sayı 2004-cü ildə ən yüksək həddə çatsa da, bu gün də bir çox insana təsir göstərir. Xəstəlik gündəlik orta hesabla 2600-dən çox insanın ölümünə səbəb olur.

Bildirək ki, ən az ölümə səbəb olanlar arasında terrorizm və təbii fəlakətlər əsas yer tutur. Onların səbəb olduğu ölümlərin faizi gündən-günə və ildən-ilə, yəni vəziyyətin şiddətindən asılı olaraq dəyişə bilir. 

Araşdırmalarımız zamanı məlum oldu ki, hər gün təxminən 48 min 742 nəfər ürək damar xəstəliyindən ölür. Xərçəng xəstəliyi isə günlük 26 min 181 can alır. Respirator xəstəlikləri də mühim ölüm səbəblərindəndir. Belə ki, gündəlik təxminən 10 min 724 nəfərin ölüm səbəbidir. Daha zəif respirator xəstəliklərindən ölənlər isə 7 min 10 nəfərdir. Demans xəstəliyi isə 6 min 889 nəfərin ölümündə rol oynayır. Həzm sistemi xəstəlikləri isə ölüm səbəbkarı olaraq 6-cı sırada dayanır. Çünki gündəlik 6 min 514 nəfər bu xəstəlik ucbatından vəfat edir. Neonatal pozğunluq isə 4 min 887 ölümün səbəbidir. İshal xəstəliyindən ölənlər də az deyil. Gündəlik 4 min 300 nəfər həmin xəstəlikdən ölür. Şəkər xəstəliyi ən çox ölümə səbəb olan 10 xəstəlik arasında 3 min 753 nəfərlə 9-cu sırada dayanır. Qaraciyər xəstəlikləri isə 3 min 624 nəfərin ölümünə səbəb olaraq 10-cu yerin sahibidir.

Xatırladaq ki, ÜST tərəfindən 11 Mart 2020-ci ildə COVID-19 pandemiya elan edildi və gündəlik ölüm sayının 272 ilə 10.520 arasında dəyişdiyi diqqətə çatdırıldı. Həmçinin gələcəkdə nəyin baş verə biləcəyi haqqında məlumat verilmədi. COVID-19-un həqiqi ölüm sayını bilmək mümkün olmasa da, bəzi ölkələrdə gündəlik ölümlərin orta həcmdən 50% yüksək olduğu hesab edilir. Daha dəqiq bir COVID-19 ölüm sayını təyin etmək üçün vaxt və əlavə təhlil tələb olunacaq. Lakin fakt budur ki, yuxarıda göstərilən ölüm nisbətlərinin çoxu daha böyük və ardıcıl informasiyaya əsaslanır.