Yenixeber.org: “Qorbaçov var gücü ilə bu yenidənqurma adlanan maşının qazını basır. Eyni vaxtda da əyləci işə salır. Motor bütün aləmə səs salıb. Bu, bizim aşkarlığımızdır. Maşın isə yerindən tərpənmir” – yazıçı Oljas Süleymanov qurultayda SSRİ-nin dağılma təhlükəsi barədə həyəcanla belə təsvirli danışırdı. Onun bu ideal bənzətməsi ibrətamizdir: maşının qazını basır, əyləci paralel basır, o sürətlə motor hay-küy salır, lakin avtomobil tərpənmir, yəni yerində sayır.
Azərbaycanda siyasi hakimiyyətin həyata keçirdiyi kadr islahatlarından biri olan Qaçqın və Məcburi Köçkünlərlə İş üzrə Dövlət Komitəsindəki sədr dəyişikliyi də həmin yenidənqurmanı, həmin motoru xatırladır. Korrupsiyaya bulaşmış, oliqarxlaşmış Əli Həsənovu Rövşən Rzayevin əvəzləməsi heç nəyi dəyişmədi. Komitə yerində sayır, yerindən tərpənməyən maşın kimi uğultu yaratmaqdan başqa dinamikliyi, hərəkətliliyi yoxdur. Siyasi iqtidar 1 milyon qaçqın və məcburi köçkünlərin problemlərinin həlli üçün böyük bir azman daşı yerindən oynatmışdı – Ə.Həsənovu fəaliyyətinin 20 illik yubileyində yola salmışdı. Çünki “Qaçqınkom”da qan dəyişikliyinə hava, su kimi ehtiyac varıydı. R.Rzayevə göstərilən etimad isə böyük bir məsuliyyət yaradırdı…
***
İl 2019. “Qaçqınkom” sədri R.Rzayevin fəaliyyətinin 365 günü tamamdır. Bu müddətdə nələr dəyişib – kimisi intihar qalxır, kimisi mənzil növbəsinə dura bilmir, kimisinin müraciətinə baxılmır, kimiləri də Şüvəlandakı sanatoriyalarda zülm çəkir – uçuq bina, susuz Kərbəla səhrasına bənzər massiv, köçkünləri eşitməyən komitə… R.Rzayev isə vədinə əməl etmir, Şüvəlandakı qaçqınları evlərlə köçürmür. Bu bir il ərzində “Qaçqınkom” şefi iki əməli ilə yadda qalıb: Ə.Həsənovdan qalan problemləri həll etməməsi və özünə 180 minlik “BMV” alıb sürməsi… Bu komitə strateji baxımdan əhəmiyyət daşıyır. Ermənistanla informasiya müharibəsində “Qaçqınkom”un fəaliyyəti mediaya və dövlətə çox lazımdır. Bu qurumun gördüyü işlərlə biz dünyaya və erməni cəmiyyətinə nümayiş etdiririk ki, köçkünlərə hansı diqqət, qayğı var və işğal edilmiş torpaqlarımızda ermənilər hansı vəziyyətdə yaşayırlar. Lakin R.Rzayevin Qorbaçovsayağı “perestroyka”sı bizi hibrid savaşında uduzdurur. Ona görə ki qaçqınların komitənin fəaliyyətindən şikayətləri, yaşadıqları cəhhənəm əzabı, ağır şərait, müraciətlərin qulaqardı edilməsiu düşməni sevindirir, ona arqument qazandırır.
Prezident R.Rzayevi bu vəzifəyə təyin etməmişdi ki, özünə “BMV” alsın, təyin eləmişdi ki, 1 milyon yurd-yuvasından didərgin düşmüş vətəndaşımızın dərdlərinə şərik çıxsın. Ancaq “Qaçqınkom” qaçqınların yarasına məlhəm olmadı. İqtidarın islahat siyasətinin əleyhinə işləyən bu fəaliyyət ciddi təhlillər aparmağı zəruri edir. Biz onlarla köçkünün internet resurslarındakı müraciətlərinə göstərə bilərik, heç birinə komitə rəhbərliyi reaksiya verməyib. R.Rzayevin heç bir proqramı yoxdur: nə Şuşanın işğalı günü yallı gedən Paşinyana cavab verir, nə qaçqınlarla bir araya gələrək onlarla söhbət aparır, nə Qarabağ qaziləri ilə görüşür…
***
Axı prezident də belə tələb edir: xalqla işləyin, mənə şikayət gəlməsin. Haqlıdır! Yəni, R.Rzayevin Ə.Həsənovun dövründən daha fərqli, daha pozitiv bir iş planı olacağı, 1 milyon qaçqının problemlərinə həssaslıqla yanaşacağı gözləntiləri vardı. Elə bu üzdən şikayətlərin sayı – hesabı yox, sosial şəbəkələr müraciətlərdən dolub – daşır, Ə.Həsənov zamanında heç vaxt olmadığı kuryoz hadisə, yəni “Qaçqınkom” binasında intihara cəhd və s. ilaxır. Belə desək, keçmiş sədrin 20 il ərzində edə bilmədiklərini yeni komitə rəhbəri son aylarda artıqlaması ilə həyata keçirdi, hamının matı – qutu qurudu. Xatırladaq ki, Füzuli rayonundan məcburi köçkün Novruzzadə Natiq Nadir oğlu mənzil problemi ilə bağlı komitənin binasında intihara cəhd edib.
R.Rzayev bu vaxtadək Milli Məclisin deputatı olub.Onun deputat fəaliyyəti boyu da bir çox qalmaqallarda adı hallanıb.ABŞ-a sanksiya müəllifliyindən tutmuş, “yoxsulluq və işsizlik 5 faizə düşüb, xalqımız xoşbəxtdir” fikrinədək R.Rzayev bəzi müəmmalı addımlara imza atıb. Hələ onun keçmiş erməni prezidenti SerjSərkisyanla görüş fotosunu demirik: nümayəndə heyətimiz başını dik tutduğu halda Rzayev Sərkisyanla əl tutub görüşəndə başını aşağı əyir..

Ümumiyyətlə, hörmətli komitə sədri ona göstərilən etimadı doğrulda bilməyib.R.Rzayevə “yuxarılar” yaxşı işləmədiyi haqda işarələr etməkdədirlər. R.Rzayevin bioqrafiyası və fəaliyyəti belə mülahizələrə səbəb olmuşdu ki, komitənin yeni sədri islahatçıdır, diqqətcildir, işləyəndir.
İlk günlərdə ürək açan proseslər getməkdəydi: strukturlarda kadr dəyişiklikləri, müraciətlərə operativ reaksiyalar, yataqxanalarda məskunlaşan köçkünlərlə görüşlər…Bəs sonra? Sonrası isə türklər demiş, palavra! Məlum oldu ki, R.Rzayev komitə sədri vəzifəsində heçdə köklü yeniliklər etmək niyyətində deyilmiş. Elə bu üzdən şikayətlərin sayı-hesabı yox, sosial şəbəkələr müraciətlərdən dolub – daşır.Belə idarəçilik nə prezidentə, nə 1 milyon köçkünə lazımdır…(REPORTYOR.info)