Görünən dağa bələdçi lazım olmadığı kimi, artıq demək olar ki, Fuad Muradov da üzərinə düşən vəzifənin öhdəsindən gələ bilmədi…

Yenixeber.org: Mediaya vəziyyətin gözəl və yüksək səviyyədə olduğunu yazdırmaqla deyil, fakt ortadadır- diaspor təşkilatlarımız arasında nifaq hələ də davam edir və bərbad vəziyyət daha da ağırlaşıb. Yeni sədrin mediaya verdiyi brifinq zamanı müharibə ritorikası ilə hədələdəiyi erməni diasporu hər gün bir addım da irəli gedir, bizdə isə əksinə olaraq ziddiyyətlər dərinləşir.

Diasporla İş üzrə Dövlət Komitəsinin rəhbəri dəyişəndən sonra bu sahədə müsbətə doğru dəyişikliklər gözləsək də son vaxtlar baş verənlər ümidlərimizi ürəyimizdə qoyur. Komitənin yeni sədri daha çox piara üstünlük verməsi ortadadır və hesab edirik ki, Komitə sədrinin KİV-lərlə əlaqələrə diqqətli olması təqdirəlayiqdir. Lakin burda bir şey önəmlidir. Fəaliyyət doğrudan müsbət nəticələrə səbəb olmalıdır və Azərbaycanın diaspor fəaliyyətində dirçəliş diqqəti cəlb etməlidir. Və bu təbii ki, Azərbaycanın xarici siyasətinin yaxın və uzaq xarici ölkələrdə dəstəklənməsi ilə hiss olunmalıdır. Lakin hələlik bu hal özün doğrultmur. Bəzi məlumatlara görə isə Azərbaycanın xarici işlər naziri Elmar Məmmədyarovla Fuad Muradovun münasibətləri heç də ürəkaçan deyi. Və söyləntilərə görə, nazir və komitə sədri faktiki olaraq bir-birlərini boykot etməklə məşğul olurlar. Bu hal təbii ki, yuxarıda da qeyd etdiyimiz kimi, dağınıq və plansız davranan diaspor təşkilatlarının fəaliyyətinə heç də müsbət təsir göstərə bilməz. Əksinə, diaspor təşkilatların fəaliyyətinə öldürücü zərbə vura bilər.

Ötən həftə yerli mətbuatın yazdığına görə, Fuad Muradovun son bir ayda bir neçə Avropa ölkəsində keçirdiyi rəsmi və qeyri-rəsmi görüşlərdə Azərbaycan səfirliklərinin nümayəndələri iştirak etməyib. Qeyd edək ki, ölkə prezidenti  İlham Əliyev dəfələrlə çıxışlarında qeyd edib ki, Azərbaycanın xarici ölkələrdəki diplomatik korpusları ilə Diaspor Komitəsi yaxından əməkdaşlıq etməlidir.

Amma deyəsən, Fuad Muradov hələ ki, dövlət başçısının bu strateji hədəfli tapşırığının icrasına nail ola bilmir. Ya da Elmar Məmmədyarovla Fuad Muradovun bir-birini qəbul etməməsi sözügedən tapşırığın icarsına əngəl törədir. Halbuki dövlətin və millətin maraq və məafelərinin olduğu yerdə şəxsi incikliklər arxa plana keçməlidir və bundan ötrü insan dövlətçi təfəkkürə malik olmalıdır.

Diasporla İş üzrə Dövlət Komitəsinin son tədbirlərindən biri olan və ölkə mediasında geniş şəkildə işıqlandırılan Gənclərinin I Yay düşərgəsinə gəlincə, rəsmi xəbərlərdən də göründüyü kimi tədbirə dəstəyi gənclər və idman nazir Azad Rəhimov verib. Komitənin rəsmi statistikasına görə, tədbirdə 37 ölkədən 140 nümayəndə iştirak edib. Amma bu təmsilçilərin çıxışları, təmsil etdikləri ölkələr barədə məlumata yerli medida rast gələ bilmədik. Həmçinin geniş şəkildə piar edilən bu tədbirdə Gənclər və İdman Nazirliyi nazir səviyyəsində qatıldığı halda, Xarici İşlər Nazirliyinin tədbirə qatılmaması bir daha onu göstərir ki, ölkə xaricində Azərbaycanın səsini eşitdirməyə vəzifəli olan bu iki qurum arasında soyuq küləklər əsir.

Əgər doğru-düzgün fəaliyyət göstəriləcəksə, ötən illər ərzində bataqlığa və qaraçı taboruna dönmüş xaricdəki diaspor təşkilatlarımızda vəziyyətin düzəldilməsi doğrudan ölkəmiz adına əsas strateji məsələdir və bu məsələdə yenidən şəxsi məslələrin dövlət maraqlarını üstələməsi ancaq təssüf hissi doğurur. Demək olar ki, bu gün Komitənin əsas vəzifəsi xaricdəki vətənpərvərləri bir araya gətirmək və Xarici İşlər Nazirliyi ilə əlaqəli şəkildə diaspor şəbəkələrini yenidən formalaşdırmaqdan ibarətdir.Görünən dağa bələdçi lazım olmadığı kimi, artıq demək olar ki, Fuad Muradov üzərinə düşən vəzifənin öhdəsindən gələ bilmədi. diaspor təşkilatlara onların səmimi və vətənpərvərliyinə görə qiymət veriləcəksə, onda KİV-lərdən qorxmağa, onlara qonaqlıq verməyə, xarici səfərlərə dəvət etməyə dəyməz. Ondansa diaspor işinə diqqət ayırmaq lazım idi. Lakin yeni rəhbərlik neylədi? Komitəni tərifləyən diaspor fəallarını, QHT rəhbərlərini, KİV-ləri “dost”, tənqid edənləri isə “düşmən” elan edərək komitədə bolşevik əhval-ruhiyyəsi yaratmağa başladı. Eyni vəziyyət həmçinin diaspor təşkilatlarla da keçərlidir. Aldığımız məlumata görə Komitə sədri diaspor təşkilatlarını da “dostlara” və “düşmənlərə” ayırmağa başlayıb. Yeni rəhbərin yeni siyasəti nəticəsində artıq diaspor işi ilə məşğul olan, bu sahəyə dəstək verən ictimai –siyasi xadimlər, diaspor fəalları və KİV-lər iki yerə bölünüblər: Fuad Müradovun fəaliyyətindən “razılar” və Diasporla iş üzrə Komitəninin fəaliyyətini tənqid etdiyi üçün “düşmən” elan olunanlar. Əvvəlki rəhbərliyin dövründə də belə idi – Nazim İbrahimovun yanında olub “dövlətçi” elan edilənlər və N. İbrahimovun sevmədiyi “düşmən dəyirmanına su tökənlər”. Beləliklə, əvvəlki vəziyyətlə indiki arasında nə fərqi oldu ki? Əgər yenə də diaspor fəalları arasında intiriqa və parçalanma olacaqdısa, tənqidçilər asi elan ediləcəkdisə, daha dəyişikliyə nə ehtiyac vardı?

Diaspor təşkilatlarının Vətən naminə koordinasiyası incə diplomatiya tələb edir. Mediada özünü təriflədib, biət etməyənləri dışlamaqla diaspor işində sahman yaratmaq olmaz. Mediaya vəziyyətin gözəl və yüksək səviyyədə olduğunu yazdırmaqla deyil, fakt ortadadır- diaspor təşkilatlarımız arasında nifaq hələ də davam edir və son aylar tənqidçilərin düşmən elan edilməsi bu sahədəki bərbad vəziyyəti daha da ağırlaşdırır.

Lap son günlər baş vermiş hadisəni dediklərimizi təsdiqləyən sübutlardan biri kimi təqdim edə bilərik. İş adamı və uzun illərdir diaspora sahəsində fəaliyyət göstərən və bu cameənin nüfuzlu şəxslərindən biri olan Füzuli Məmmədovun( Frenk Elkapone) Avropa Azərbaycanlıları Konqresinin birinci vitse-prezidenti vəzifəsindən kənarlaşdırılması qeydlərimizi təsdiq edən onlarla faktdan biridir.

Fuad Muradov diasporla iş komitəsinin sədri gələnə qədər bu vacib qurumda belə intiriqalar demək olar ki, yox idi. Lakin yeni rəhbərliyin gəlişindən sonra bu qurumun iki nüfuzlu rəhbəri arasında düşmənçilik səviyyəsinə qalxmış qarşıdurma yarandı və nəticədə Füzuli Məmmədov Assambleyadan uzaqlaşdırıldı. Tərəfdarlarının redaksiyamıza verdiyi məlumata görə, Füzuli Məmmədovun qurban verməsinin səbəbi onun Avropada və Rusiyadakı nüfuzudur. Komitənin yeni sədri belə bir nüfuzlu və maddi imkanlı şəxsi idarə edə bilməyəcəyindən daha zəif, sözəbaxan bir füqurla əməkdaşlığa tərcih edib. Hazırda isə Azərbaycanlıları Konqresi parçalanmış vəziyyətdədir.

Diaspor icmalarımızın daxilində və təşkilatlarımızın arasındakı intiriqalarla bağlı misalların sayını artıra da bilərik…

Belə qarşıdrumalar nəticəsində əslində olan diasporumuza olur. Xaricdəki icmalarımızın, təşkilatlarımızın daxilində gedən çəkişmələr enerjinin xırda intiriqalara, qarşıdurmalara sərf olunmasına gətirib çıxarır ki, nəticədə ziyan diaspor işinə dəyir. Yeni sədrin mediaya verdiyi yeyib-içmək zamanı müharibə ritorikası ilə hədələdəiyi erməni diasporu hər gün bir addım da irəli gedir, bizdə isə əksinə olaraq ziddiyyətlər dərinləşir, Vətən, ümumi maraqlar naminə fəaliyyət unudulur, bir sözlə, geri gedirik. Eynən Nazim İbrahimovun zamanında olduğu kimi. Durum yenə də ürəkaçan deyil. Belə getsə, gənc və perspektivli komitə sədri vəziyyəti düzəltmək əvəzinə, daha da pisləşdirəcək.

Mövzunu diqqətdə saxlayırıq və Diasporla İş üzrə Dövlət Komitəsindən veriləcək açıqlamanı səbirsizliklə gözləyirik.

© pia.az