Hazırki böhran şəraitində buna Vətənə, xalqa, prezidentə xəyanətdən başqa bir ad vermək olmaz

Xeberinfo.com: Sadiq oxucularımız xatırlayarlar: Mediatv.az saytında "Yardımlının yardıma ehtiyacı olan kəndində faydalı qazıntılar" sərlövhəli məqalə təqdim olunmuşdu. Bildirmişdik ki, qeyri-leqal biznes rayonun Tilə kəndini rayon mərkəzindən, eləcə də respublikanın digər rayonlarından təcrid edib.

         Xəbər vermişdik ki,  Masallı – Yardımlı şosse yolunun 21-ci kilometrliyindən başlayaraq iritonnajlı yük maşınlarının yük daşıması, qəzalı vəziyyətdə olan Masallı və Yardımlı rayonlarını birləşdirən körpü üçün böyük təhlükə yaradır, torpaq sürüşmələri baş verir, yol nahiyəsi bunca ağır yük maşınları üçün nəzərdə tutulmadığından asfalt örtüyü dağılır, 70-80 min vətəndaş blokada şəraitinə düşür.

         Vəd etmişdik ki, sözügedən məsələyə “Azəryolservis” ASC-nin rəhbərliyinin, Masallı və Yardımlı rayon İcra Hakimiyyəti orqanlarının bu məsələyə  diqqətini yönəltməyə, həmçinin niyə vergi orqanlarının heç kəsdən gizlənməyən, açıq-aşkar “qara iqtisadiyyat” nümunəsi olan fəaliyyət növündən əldə olunan gəlirləri vergiyə cəlb etmədikləri müəmmasına aydınlıq gətirməyə çalışacağıq. 

19.11.2015 tarixdə 10/124 nömrəli məktubla "Azəravtoyolservis" ASC-nin sədrinə,eyni zamanda 19.11.2015 tarixdə 10/125 nömrəli məktubla Yardımlı rayon icra İcra Hakimiyyətinin başçısına sorğu ilə müraciət etdik.

"Azəryolservis"ASC-i 4/02-7284 nömrəli cavabında yeni yolun  çəkilişi ilə əlaqədar ağır tonnajlı nəqliyyat vasitələrinin matreallarla körpüdən keçərək daşınmasının dayandırıldığını bildirdi.

Yardımlı rayon İcra Hakimiyyəti isə rəsmi sorğumuza cavab vermədi.Cavab verməmək ya yazdıqlarımızla razılaşmaq əlamətidir,ya da ki mətbuatla işləmək istəməməkdir.Biz bir yazar olaraq  rayon sakinlərini narahat edən problemlə bağlı rayon rəhbərliyinin mövqeyini öyrənmək istədik.Rayon rəhbərliyi isə susmaqla cavab verdi...

Bu günlərdə redaksiyamıza adı çəkilən ərazidə işin gücləndirildiyi, ağır tonnajlı nəqliyyat vasitələrinin Masallı-Yardımlı yolunda hərəkət etdiyi haqda məlumat verilib.Bildiririk ki yolun 17km-i Masallı rayon ərazisinə, 4km isə Yardımlı rayon ərazisinə aiddir.Nə rayon camaatının narahatlığı,nə də ki ölkə rəhbərinin belə özbaşınalıqlara barmaq silkələməsi onları işindən saxlaya bilmədi.Əraziyə dəymiş ziyanın müəyyənləşdirilməsi və müvafiq tədbirlərin görülməsi hələ

ki heç bir dövlət orqanını maraqlandırmır.

Çox təəssüflər olsun ki, adı çəkilən rayon rəhbərlərinin eləcə də bu işlərə cavabdeh olan qurumların çox ciddi bir məsələyə laqeydliyi və ya şəxsi maraqlar çərçivəsində razılıq verməsinə  “ad qoymaq” çox çətindir.

         Dəqiqləşdirməyə müvəffəq olmuşuq ki, sözügedən ərazidən material daşıyan ağırtonnajlı yük maşınları İpək yolunun çəkilişi ilə məşğul olan "AzPo" və "Kolo" şirkətlərinə xidmət edirlər.Mediatv.az-a verilən məlumata görə Nəqliyyat naziri Ziya Məmmədovun qardaşı sabiq deputat Elton Məmmədova məxsus olan bu maşınlar Yardımlı - Masallı yolunun asfalt örtüyünü faktiki olaraq dağıdırlar. Məsələ burasındadır ki, layihədə İpək Yolunun çəkilişində istifadə olunacaq materialların məhz karxana statuslu istismarçıdan alınmasının vacibliyi tələb kimi qoyulub. Aşkar görünür ki, podratçılar öz xərclərini azaltmaq, dövlətdən məqsədli şəkildə ayrılan maliyyə vəsaitini mənimsəmək üçün bu "səmərəli" üsula əl atıblar, bir tərəfdən tikir, digər tərəfdən sökürlər. Gəlin razılaşaq ki, hazırki böhran şəraitində buna Vətənə, xalqa, prezidentə xəyanətdən başqa bir ad vermək olmaz. Maraqlıdır ki, artıq Nəqliyyat Nazirliyinin tabeçiliyindən çıxarılmış "Azəryolservis" QSC-nin rəhbərliyinin məsələyə münasibəti necə olacaq.

         Mövzuya qayıdacağıq.   

Mediatv.az