Layihə 2025-ci il avqustun 1-dən başlayaraq oktyabrın 31-dək, yəni 3 ay müddətində həyata keçiriləcək. Layihənin rəhbəri və təşkilatın sədri Şahməmməd Soltanovdur.

Layihənin əsas məqsədi Azərbaycan və Özbəkistan arasında qədim dostluq və qardaşlıq münasibətlərinin mədəni və ədəbi sahədə daha da gücləndirilməsi, iki xalq arasında ədəbi körpünün möhkəmləndirilməsi, həmçinin hər iki ölkənin şair və yazıçılarının yaradıcılığının qarşılıqlı şəkildə tanıdılmasıdır.

Layihə çərçivəsində Azərbaycan və Özbəkistan şairlərinin şeirlərindən ibarət ədəbi toplu hazırlanacaq və ictimaiyyətə təqdim ediləcək. Bu toplu hər iki xalqın zəngin poeziya ənənələrini, ortaq ruhunu və ədəbi dəyərlərini bir araya gətirəcək.

Təşkilatın sədri, layihə rəhbəri Şahməmməd Soltanov bildirib ki, “Azərbaycan və Özbəkistan xalqları arasında ədəbi körpünün qurulması həm mədəni əməkdaşlığın, həm də dostluq münasibətlərinin inkişafına xidmət edir. Bu layihə vasitəsilə gənc nəslin ədəbiyyata marağı artacaq, oxucular iki xalqın ədəbi ruhuna daha yaxından bələd olacaqlar. Həmçinin, bu təşəbbüs gələcəkdə daha geniş mədəni layihələrin əsasını qoyacaq.”

Layihə, Azərbaycan–Özbəkistan əlaqələrinin möhkəmlənməsi, ədəbi irsin qorunması və iki xalq arasında qarşılıqlı anlaşmanın dərinləşməsi baxımından mühüm əhəmiyyət daşıyır. Ədəbi körpü yalnız sözlə deyil, dostluq, mədəniyyət və ortaq tarixlə də birləşdirici bir simvol kimi çıxış edir.