Bu gün İstanbulda baş vermiş zəlzələ nəticəsində 8 nəfər yaralanıb.

Yenixeber.org: Məlumata görə, bu rəqəmi Türkiyə Prezidenti Rəcəb Tayyib Ərdoğan açıqlayıb.

Türkiyə Prezidentinin sözlərinə görə, zəlzələ nəticəsində şəhərin bəzi yerlərində binalarda çatlar da əmələ gəlib.

R.T.Ərdoğan qeyd edib ki, bu saata qədər 28 yeraltı təkan qeydə alınıb.

Türkiyə dövlət başçısının sözlərinə görə, zəlzələnin fəsadlarını aydınlaşdırmaq məqsədilə vitse-prezident Fuat Oktayın rəhbərliyi altında dövlət komissiyası da yaradılıb.

*   *   *15:20

Türkiyənin İstanbul şəhərində növbəti güclü zəlzələ baş verib.

Yerli KİV-lər bildirir ki, ilkin məlumatlara əsasən, zəlzələ 5.9 bal gücündə olub.

Yeraltı təkanlar təxminən 30 saniyə davam edib.

Məktəblər, xəstəxanalar, ticarət mərkəzləri təcili təxliyə olunub. Telefon xətləri kəsilib. Şəhərdə böyük panika yaranıb. Sakinlər evlərini tərk etmək məcburiyyətində qalıblar.

Avcılar rayonunda yerləşən məscidin minarəsi dağılıb.

Qeyd edək ki, İstanbulda bu gün səhər saatlarında da 3.6 bal gücündə zəlzələ baş vermişdi.