Azərbaycan şirkətləri erməni mobil şirkətlərinin ötürücü qurğularını iflic vəziyyətinə salıb. Artıq işğal altında olan Qarabağda yaşayan ermənilər mobil rabitədən istifadə edə bilmirlər.

Yenixeber.org:  İki gündür işğal edilmiş Qarabağda qanunsuz olaraq fəaliyyət göstərən erməni mobil şirkətlərinin ötürücü qurğuları iflic vəziyyətinə düşüb. Erməni abonentlərin telefonunda yalnız "Azercell”, "Bakcell” və "Nar Mobile” şəbəkəsi göstərilir.

Qaynarinfo xəbər verir ki, informasiya təhlükəsizliyi sahəsində çalışan erməni mütəxəssislər artıq bu çətinliyin öhdəsindən gələ bilmirlər. 

İnformasiya təhlükəsizliyi üzrə erməni mütəxəssisi Samvel Martirosyan erməni mətbuatına açıqlamasında bunu belə izah edib:

"Azərbaycan mobil operatorları gücləndirilmiş ötürücü qurğulardan istifadə edir. Məhz bu səbəbdən Qarabağda iki gündür yalnız "Azersell”, "Baksell” və "Nar Mobile” şəbəkəsini tutmaq mükündür. Bu bizim mobil operatorlarımızın bərbad işinin nəticəsidir”.

Qarabağda yaşayan ermənilər bu hadisədən şoka düşdüklərini bildiriblər. Sosial şəbəkədə bu barədə yazan erməni bloqqer Robert Dilicanyan bu hadisəni belə şərh edib: 

"Hər kəs qorxu içindədir. Şuşada belə telefonla danışmaq mümkün deyildi. Azərbaycanın hücum etməsi qorxusu bizi məhv edib. Bir anlıq elə fikirləşdik ki, Azərbaycan ordusu yenə hücuma keçib."