Hesab edirəm ki, bundan sonra Paşinyansayağı çıxışlar, bəyanatlara artıq son qoyulacaq.

Yenixeber.org: Bu sözləri YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə deyib. O bildirib ki, Paşinyan artıq reallığa əsaslanmalı olduqlarını dərk edib:

“Hesab edirəm ki, qısaca da olsa, ayaqüstü görüş Ermənistanın baş nazirinin reallığı dərk etməsinə zəmin yaratdı. Pozitiv mənada bu münaqişənin həllinə, danışıqların əvvəlki formatda davam etdirilməsinə təsir edəcək. Münaqişə Azərbaycanın ərazi bütövlüyü çərçivəsində, beynəlxalq hüquq prinsipləri daxilində həll olunmalıdır. Çünki bu məsələnin həlli beynəlxalq hüquq çərçivəsində reallığa əsaslanır”.

V.Rəhimzadə qeyd edib ki, Paşinyanın bu görüşdən sonrakı fikrinə nə qədər sadiq qalacağını zaman göstərəcək:

“Çünki bəzi məqamlarda erməni verdiyi sözü tutmur. Paşinyanın bir gün bir fikri səsləndirib, səhəri gün onu təkzib etmə hallarına da rast gəlmişik. Amma hər halda Paşinyan reallığı dərk etməlidir. Və işğal altında saxladığı Azərbaycan torpaqlarını işğaldan azad etməlidir. Bunu beynəlxalq hüquq, beynəlxalq təşkilatların qətnamələri, bütövlükdə dünya ictimaiyyəti deyir”.(axar)