Qırğızıstan Prezidenti Sadır Japarov Nazirlər Kabinetinin keçmiş sədri Akılbek Japarovun istefasına münasibət bildirib.

Yenixeber.org xəbər verir ki, Prezidentin sözlərinə görə, istefa vergi sahəsindəki pozuntuların araşdırılması fonunda maraqlar toqquşmasını aradan qaldırmaq zərurətindən irəli gəlib.

O vurğulayıb ki, vergi orqanı birbaşa keçmiş baş nazirin nəzarətində olub, bununla belə, aksiz markalarıyla bağlı problemləri daha əvvəl həll etmək olardı.

"Bildiyiniz kimi, aksiz markalarıyla bağlı bütün fırıldaqlar bu gün araşdırılır. Vergi sahəsi birbaşa Akılbek Japarovun nəzarətində idi. Bu qanunsuz hərəkətlərin qarşısını daha əvvəl almaq olardı. Bu kimi addımlara və Dövlət Vergi Xidmətinin rəisinin saxlanılmasına görə, bu gün istintaq gedir, şəxsi maraqların təqibi olmasın deyə, mən onu vəzifəsindən kənarlaşdırmağa məcbur oldum", - S.Japarov bildirib.

Xatırladaq ki, bu gün Qırğızıstan Prezidenti Sadır Japarov Adılbek Kasımaliyevi Nazirlər Kabinetinin sədri və prezident administrasiyasının rəhbəri, həmçinin Daniyar Amangeldiyevin Nazirlər Kabinetinin birinci müavini, Bakıt Sıdıkovun isə iqtisadiyyat və ticarət naziri təyin edilməsi haqqında fərmanlar imzalayıb.