Rusiya Federasiyasında keçirilən prezident seçkiləri Putinin gözlənilən qələbəsi ilə başa çatdı.

Yenixeber.org xəbər verir ki, bir sıra dövlət başçıları Putini yenidən president seçilməsi münasibətilə təbrik etdilər. Lakin etməyənlər də az olmadı…

Rusiya Federasiyası Mərkəzi Seçki Komissiyasının məlumatına görə, seçicilərin təxminən 87,29 faizi hazırkı prezidentə səs verib.

Rusiyanın ənənəvi rəqibi ABŞ Putinin Rusiya Federasiyasının prezidenti olması səbəbindən onunla işləməyə davam edəcəyini açıqlayıb. Eyni zamanda Ağ Ev bəyan edib ki, Putinin siyasi rəqiblərini necə sıxışdırdığını nəzərə alaraq, bu seçkiləri müstəqil və ədalətli adlandıra bilməz.

Avropa İttifaqının xarici siyasət missiyasının rəhbəri Cozef Borrell bildirib: “Rusiya hakimiyyəti müxalifət xadimlərini, vətəndaş cəmiyyəti strukturlarını, müstəqil medianı və digər tənqidi şəxsləri təqib edərək daxili repressiyaları gücləndirməkdə davam edir”.

Putini ilk təbrik edənlərdən biri Türkiyə prezidenti Rəcəb Tayyib Ərdoğan olub. O qeyd edib ki, Rusiya-Türkiyə çoxvektorlu münasibətlərinin inkişafına inanır.

Ərəb dünyasının əsas liderlərindən biri, Səudiyyə Ərəbistanının vəliəhd şahzadəsi Məhəmməd Bin Salman Əl Səud da telefon danışığında Putini təbrik edib və ümid etdiyini bildirib ki, artıq formalaşmış səmərəli əməkdaşlığın davam etmək meyli var.

Azərbaycan Prezidenti İlham Əliyev Rusiyada keçirilən seçkilərin nəticələrini inamlı qələbə kimi qiymətləndirib.

Ermənistanın Baş naziri Nikol Paşinyan Rusiya Prezidenti Vladimir Putini yenidən prezident seçilməsi münasibətilə təbrik edib. Paşinyan həmçinin qeyd edib ki, Rusiya ilə Ermənistan arasında dialoqun bərpa olunacağına ümid edir. Son olaraq, o, Putinə can sağlığı arzulayıb.

Çin isə Xarici İşlər Nazirliyi rəsmisinin vasitəsilə Putini qələbə münasibətilə təbrik edib.

Həmas lideri İsmayıl Haniyanın təbriki də olduqca maraqlı olub və o, mesajında ​​deyib: “Biz əməkdaşlığımızın güclənməsinə və mövcud əlaqələrin inkişafına ümid bəslədiyimizi bildiririk”.

Putinə ən yaxın prezident, Belarus lideri Aleksandr Lukaşenko da təbrik edənlər sırasındadır.

Putini Tacikistan, Qırğızıstan, Boliviya, Nikaraqua, Şimali Koreya, Honduras, Myanma və Küveyt liderləri də təbrik ediblər.

Hindistanın baş naziri də Putinə Hindistan və Rusiya Federasiyası arasında əməkdaşlığın gələcəkdə daha geniş vüsət alacağına ümid etdiyini bildirən təbrik ünvanlayıb.

İran prezidenti İbrahim Rəisi İran və Rusiya arasında dostluq əlaqələrinin eyni istiqamətdə davam edəcəyinə ümidvar olduğunu bildirib. İki ölkə liderləri ticarət-iqtisadi əlaqələrin genişləndirilməsi və birgə investisiya layihələrinin həyata keçirilməsini də müzakirə ediblər.

Moldova Putini təbrik etməsə də, ölkənin müxalifət partiyasının rəhbəri, Moldovanın keçmiş prezidenti İqor Dodon təbrik edib.

Rusiya Xarici İşlər Nazirliyinin rəsmi nümayəndəsi Mariya Zaxarova NATO-ya üzv ölkələrin reaksiyasına toxunaraq, onları işığı yandırıldıqda dərhal qaranlığa qaçan zülmət həvəskarları ilə müqayisə edib.

"Deyirlər ki, seçkilər ədalətli deyil, lakin biz onu nəzərə alırıq, həm də qəbul etmirik, lakin təmaslara hazırıq", - Zaxarova Qərb ölkələrinin təbriklərini belə xarakterizə edib.

O, ABŞ-ın bəyanatının bu məntiqə söykəndiyini vurğulayıb.

Litva və Almaniya Xarici İşlər nazirliklərinin nümayəndələri bəyan ediblər ki, onların ölkələri Rusiyadakı seçkilərin nəticələrini qəbul etməyəcəklər.

“Seçki prosesi Putinin öz xalqına qarşı pis münasibətini göstərməklə yanaşı, həm də BMT Konvensiyasını pozur”, - Almaniyanın xarici işlər naziri Annalena Berbok bildirib.