Xəbər verdiyimiz kimi, Azərbaycan Müdafiə Nazirliyi noyabrın 16-da Ermənistan silahlı qüvvələrinin bölmələrinin dövlət sərhədinin Kəlbəcər və Laçın rayonları sahəsində ölkəmizə qarşı genişmiqyaslı təxribat törədiyinə dair məlumat yayıb.

Yenixeber.org: Məlumatda bildirilib ki, Ermənistanın hərbi birləşmələri dövlət sərhədinin bu istiqamətindəki yüksəklikləri ələ keçirmək və hərbi üstünlüyə nail olmaqla daha əlverişli mövqelərə yiyələnmək məqsədilə noyabrın 16-sı saat 11.00 radələrində qəfil hərbi əməliyyata başlayıb. Basarkeçər və Qarakilsə rayonlarında yerləşən sərhəd-döyüş mövqelərinə əlavə canlı qüvvə, hərbi və xüsusi texnika cəmləşdirən Ermənistan hərbi bölmələri Azərbaycan Ordusunun Kəlbəcər və Laçın rayonlarındakı döyüş postlarına hücum edib. Hətta Azərbaycan Ordusunun mövqelərini müxtəlif çaplı atıcı silahlar və qumbaraatanlardan intensiv atəşə tutaraq döyüş postlarımıza atəşlə zərər vurub. Nəticədə ilkin məlumata görə Azərbaycan Ordusunun iki hərbi qulluqçusu yaralanıb.

Bu təxribata cavab olaraq görülmüş qəti tədbirlər nəticəsində erməni hərbçiləri tərksilah edilərək saxlanılıb, xeyli sayda müxtəlif çaplı silah və külli miqdarda sursat qənimət kimi ələ keçirilib.

Erməni tərəfi isə həmişəki kimi tam fərqli məlumat yayıb.

Erməni mətbuatı xəbər verir ki, Ermənistan Müdafiə Nazirliyi guya Azərbaycan tərəfinin Ermənistanın şərq sərhədlərində erməni silahlı qüvvələrini atəşə tutaraq, irəliləməyə cəhd göstərdiyini iddia edib. Rəsmi məlumatda erməni hərbçilərinin Azərbaycan tərəfindən tərkisilah olunaraq həbs edildiyi açıqlanmayıb.

Ancaq Ermənistanın “Hraparak” qəzeti 6 erməni hərbçisinin Azərbaycan Silahlı Qüvvələri tərəfindən əsir götürüldüyünü yazıb. Qəzet hazırda sərhəddə ağır hərbi texnika və artileriyadan istifadə olunmaqla atışmanın davam etdiyini bildirir.

Zəngəzurun Noravan kəndinin icra nümayəndəsi Slavik Papyan isə Azərbaycan hərbi birləşmələrinin kəndə doğru 2 kilometr irəlilədiyinə dair məlumat verib.

Caliber.az saytı isə yazır ki, sözügedən insident zamanı erməni tərəfi yeni itkilər verib: “Bizim düşmənin itkilər verdiyinə dair etibarlı mənbələrə əsaslanan məlumatımız var. Bizim sərhədlərimizə hücum cəhdi erməni cəmiyyəti üçün fəlakətlə nəticələndi...”

Hələ ki, ələ keçirilən erməni hərbçilərinin sayı, itkilər barədə dəqiq və ətraflı məlumat verilməsə də, sərhəddə vəziyyətin çox gərgin olduğu şübhə doğurmur. Yəqin ki, yaxın saatlarda sərhəddəki durumla bağlı daha müfəssəl məlumatlar əldə olunacaq.(azpolitika)