Şirvan şəhəri 21 nömrəli orta məktəbinin direktoru Səadət xanım və məktəbin ingilis dili müəllimi Maral Allahverdiyeva haqqında ciddi ittihamlar səsləndirilib. İddialara görə, direktor Səadət xanımın dəstəyi ilə Maral Allahverdiyeva ailəsi ilə birlikdə Almaniyaya Qaçqınlıq Statusu almaq məqsədilə köç edib.
Yenixeber.org: Bir müddət əvvəl bu haqda sosial şəbəkələrdə paylaşım edildiyi də bildirilir:

Məlumatlara əsasən, Maral Allahverdiyeva həyat yoldaşı və üç övladı ilə Almaniyaya gedib, lakin bir müddət sonra deportasiya edilərək geri, Azərbaycana qaytarılıb. Hadisənin ən diqqətçəkən məqamlarından biri Maral Allahverdiyevanın böyük övladının 9-cu sinifdə oxuduğu halda, imtahana buraxılması üçün məktəbin bütün fənn müəllimlərinin göstəriş əsasında onun qiymətlərini saxta yolla yazmalarıdır.
Bundan əlavə, müəllimənin heç bir əsas olmadan iş yerini tərk etməsinə baxmayaraq, vəzifəsinə qayıtmaqda çətinlik çəkmədiyi bildirilir. O, Almaniyaya getməsini övladının müalicəsi ilə əlaqələndirsə də, bunun əsassız olduğu, övladının xəstəliyi ilə bağlı heç bir rəsmi sənədin və ya poliklinikadan təsdiqin olmadığı qeyd olunur.
Şikayətdə vurğulanır ki, Maral Allahverdiyevanın bu cür üstünlüklərdən faydalanmasının səbəbi onun Şirvan Təhsil Şöbəsinin müdiri Rövşən Allahverdiyevin qohumu olmasıdır. Buna görə də, onun uzun müddət dərsə gəlməməsi ilə bağlı heç bir tədbir görülməyib.
Direktor Səadət xanım isə uzun illərdir 21 saylı məktəbə rəhbərlik edir. Onun Maral Allahverdiyevaya bu imtiyazları verməsi ilə bağlı iddialar məktəb kollektivində ciddi narazılıq yaradıb. Müəllimlər məsələdən xəbərdar olsalar da, direktorun qorxusundan bu haqda açıq danışa bilmədikləri bildirilir.
Əlavə olaraq, iddia edilir ki, Səadət xanım məktəbdə korrupsiya və rüşvət halları ilə məşhurdur. Məsələ ilə bağlı Elm və Təhsil Nazirliyinin hər hansı tədbir görməməsi də sual doğurur. Şikayətçilər hesab edirlər ki, bu qanunsuzluqlara qarşı tədbir görülməli və təhsil sistemində şəffaflıq təmin edilməlidir.
Bu iddialarla bağlı rəsmi qurumların mövqeyi hələlik açıqlanmayıb. Hadisə ilə bağlı təhsil orqanlarının araşdırma aparıb-aparmayacağı da maraq doğurur.