Yenixeber.org: Aparıcı Kamran Həsənli SMS-lə icazələrin ləğvi və çimərliklərin açılması qərarından sonra iş yerlərinin, açıq hava əyləncə mərkəzləri, restoranlar və şadlıq evlərinin bağlı olmasına və toylara olan qadağalardan danışıb.

"Əgər bizim qazanc yerimiz bağlıdırsa, iş yerlərimiz bağlıdırsa, küçəyə veyillənməyəmi gedəcəyik?", o İnstagram hesabında sual verib.

Kamran Həsənlinin sözlərinə görə, toylara qoyulan qadağa, təkcə "50-60 tanınmış müğənniyə" deyil, on minlərlə musiqiçiyə, eləcə də ofisiantlar, administratorlar, fotoqraflar, rəqqaslar, aşbazlar, xidmətçilər, işıqçılar, elektriklər, restoranlar ərzaq və içki ilə təmin edənlərə təsir edib - "yüzminlərlə insan işsiz, pulsuz, parasız qalıblar".

"On minlərlə musiqiçi 5 aydır evlərinə çörək pulu apara bilmir, onların çoxu kirayədə qalır, onların evində yaşlı insanlar var, körpələr var, dərman almalıdırlar, yemək almalıdırlar. Pulsuz-parasız qalıblar," o deyib.

O əlavə edib ki, kiçik və orta biznes "məhv halındadır, kollaps halındadır".