Bakı Şəhər İcra Hakimiyyətinin təşəbbüsü ilə bugün Bakı şəhərinin bütün rayonlarında iməclik keçirilir.

Yenixeber.org: Ölkə rəhbərliyinin yaşıllıqların mühafizəsi və Bakı şəhərinin görkəminin qorunması ilə bağlı tövsiyə və göstərişlərinə uyğun olaraq şəhərimizdə ərazilərin təmizlik-abadlığı ilə bağlı iməcliklər keçirilmişdir.

Bu iməcliklərdən biri də Nərimanov rayonunda təşkil olunub. Rayon ərazisində bütün mərkəzi prospektlər, küçələrdə təmizlik-abadlıq işləri aparılıb.

Belə ki, rayonun Heydər Əliyev prospekti, Atatürk prospekti, Həsənoğlu, A.Neymətulla küçələrində, F.X.Xoyski prospektində, Azadlıq prospekti, Xətai prospekti, Təbriz küçəsi və digər mərkəzi küçələrdə fəaliyyət göstərən obyektlərin vitrin şüşələri təmizlənmiş, küçələrdə qurumuş ağaclar budanmış, mövsümi gül kolları dəyişdirilmiş, səkilər və ağaclar su ilə yuyulmuş və yaşıllıqlara aqrotexniki xidmətlər göstərilmişdir.

Ərazidə olan yaşıllıqlara daimi qulluq göstərilməsi məsələləri Rayon İcra Hakimiyyəti tərəfindən nəzarətdə saxlanılır.

Aksiya çərçivəsində küçələrdə olan qanunsuz küçə ticarəti təmizlənmiş, metroların giriş-çıxışları yuyularaq təmizlənmişdir.

Bu işlər hər həftənin şənbə günləri davam etdiriləcəkdir.

Ümumilikdə rayon ərazisində keçirilən iməclikdə 2,5 mindən çox rayon təsərrüfatı xidməti işçiləri, idarə, təşkilat, ictimaiyyət nümayəndələri iştirak etmişdir.